NJË ADAPTIM PËR “OSCAR”
“Gusht: Portret familjar” u shfaq për herë të parë në vitin 2007 në Çikago dhe një vit më vonë, autori i saj Tracy Letts do të nderohej me çmimin “Pulitzer”. Vepra është vënë në shumë skena teatrore, jo vetëm në Amerikë, ku është shfaqur me shumë sukses, por edhe Europë, madje deri në Tajvan, ku është adaptuar në një familje tajvaneze. Vetëm në Broadway ka dhënë 648 shfaqje. Por për publikun e gjerë, madje edhe për atë shqiptar, vepra është bërë popullore falë filmit përshtatur prej kësaj vepre dramatike: “August: Osage county”, me skenar të po Tracy Letts, regji të John Wells, ku do të spikasë loja e shkëlqyer e aktoreve Meryl Streep në rolin Violetës dhe Julia Roberts, në rolin e Barbarës, vajzës së madhe të shtëpisë. Të dyja aktoret janë kandiduar për çmimin “Oscar”.