Të përndjekurit, nis ndarja e këstit të tretë
Ministria e Financave nis ndarjen e parave për 300 trashëgimtarët e parë të ish- të përndjekurve me vendimet e 2008- 2009. Lista me emrat që janë në radhë
Nis ndarja e këstit të tretë për trashëgimtarët. Ndonëse duhet të nisnin në dhjetor, Ministria e Shëndetësisë si institucioni që bën lëvrimin e fondit për këtë kategori, ka nisur pagesat këtë fillimvit. Dhe kjo jo për të gjithë dosjet e shqyrtuara, por vetëm për një pjesë prej tyre. Gjithsej janë 300 dosje që kanë kaluar për pagesë.
Përfituesit janë nga radhët e 1700 dosjeve të marra në shqyrtim në këtë fazë të parë, të miratuara me Vendim të Këshillit të Ministrave, përkatësisht në vitet 2008- 2009. Gazeta e boton sot të plotë listën, ku përveç atyre që e kanë marrë këstin e tretë janë edhe të tjerët për të cilët ndarja e këstit të tretë do të bëhet përgjatë javëve në vijim.
DOKUMENTET
Plotësimi i dosjes me dokumentet e nevojshme ishte kushti i vetëm që duhet të plotësonin trashëgimtarët për të marrë dëmshpërblimin. Por që kjo të ndodhte, duhej që secili prej përfituesve ligjor të dorëzonte dorazi apo nëpërmjet shërbimit postar në adresë të Ministrisë së Financave: kopje të letërnjoftimit, numër llogarie, certifikatë vdekjeje, certifikatë të trungut familjar, dëshmi trashëgimie dhe prokurë. Pamjaftueshmëria e fondit ka bërë që vetëm një numër i ulët ta marrë këstin e tretë. Me hyrjen e vitit ri nis edhe lëvrimi i fondit për vitin 2019. Kujtojmë që për këtë vit nga buxheti i shtetit janë vënë në dispozicion sërish 2 miliardë lekë. Duke qenë se procesi për kategorinë parësore, pra, për ndarjen e dëmshpërblimit për të dënuarit që jetojnë po shkon drejt fundit, atëherë i gjithë fondi vjetor apo pjesa dërrmuese e tij do të shkojë për trashëgimtarët.
PËRFITUESIT
Nga Ministria e Financës është bërë me dije se për 1700 dosjet, procesi për ndarjen e këstit të tretë do të përfundojë brenda muajit qershor të këtij viti. Duhet thënë se një pjesë e konsiderueshme e tyre kanë bërë plotësimet e nevojshme, ndaj edhe vlen të theksohet se ata të cilët e kanë përmbyllur këtë proces, pra, e kanë dorëzuar dokumentacionin që kërkohet, nuk kanë më asnjë detyrim. Lidhur me këstet vijuese, Financat sqarojnë se pagesat do të kryhen mbi bazë e dokumentacionit të dërguar më parë, kur nuk ka kontestim, nga rrethi i familjarëve ose trashëgimtarëve.