Dekretohet Rama, Ruçi: Pres që Meta të mos veprojë sipas orekseve partiake
Kreu i Kuvendit komenton ministrat jashtë radhëve të PS: Jemi në sistemin parti- pushtet, duhen 700 mijë vota për të fituar zgjedhjet
Sigurisht, unë nuk jam pishman për votën që jap dhe për qëndrimet që mbaj në këtë çështje dhe, sigurisht, as nuk kam pritur që Presidenti i Republikës, kushdo të ishte ai, edhe zoti Meta, të operojë gjatë përmbushjes së detyrës së tij sipas orekseve politike, elektorale apo partiake të asnjë pale. Kam pritur dhe pres që zoti Meta të zbatojë Kushtetutën si President i vendit dhe vetëm kaq. Për këtë nuk kam pse të jem pishman, ashtu sikurse edhe kthimi i ligjeve, që është në kompetencën e tij, i cili me dekret i është drejtuar Kuvendit
Kryetari i Kuvendit, Gramoz Ruçi, theksoi dje se Presidenti Meta duhet të shprehej me dekret në të gjitha rastet për ministrat e propozuar nga Kryeministri, duke përfshirë edhe rastin Cakaj.
Gjatë një konferencë për shtyp, Ruçi theksoi se edhe në rastet e refuzimit, Presidenti duhet të shprehet me dekret dhe është Kuvendi ai që merr vendim. Krahas kësaj, Ruçi bëri të ditur dje se projektligji i miratuar nga Komisioni i Reformës Zgjedhore nuk do të futet në kalendarin e punimeve të Kuvendit pa gjetur konsensusin me opozitën.
Pak ditë më parë, Presidenti i Republikës refuzoi që Genti Cakajn ta dekretojë si ministër të Jashtëm, akt i cili u konsiderua nga Kryeministri si antikushtetues. Ju e ndani këtë mendim të Kryeministrit? Pra, sipas jush, ishte shkelje e Kushtetutës nga Presidenti Meta?
Unë nuk merrem me këto komente, por merrem me nenin 93 të Kushtetutës, të cilin, më vjen keq, por të gjithë ata që flasin në emër të Kushtetutës, siç edhe jua thashë, nuk e kanë lexuar nenin e parë ende, ashtu sikurse nuk kanë lexuar edhe nenin 93 të Kushtetutës. Neni 93 i Kushtetutës thotë: “Presidenti i Republikës, në zbatim të kompetencave të tij, nxjerr dekrete ose shprehet me dekret”. Pra, unë nuk e vë fare në diskutim a ka të drejtë Presidenti të thotë po ose jo, por ajo që thotë Kushtetuta është që Presidenti, për të gjithë kompetencat që ka, duhet të shprehet me dekret. Çfarë do të thotë kjo? Kjo do të thotë që, siç e lexoj unë Kushtetutën, edhe kur jep pëlqimin, edhe kur nuk e jep pëlqimin, pra, ka kundërshtim, duhet të nxjerrë dekret. Duhet të nxjerrë dekret se është kompetencë e Kuvendit të shprehet si për pëlqimin, edhe për mospëlqimin e dekretit. Megjithatë, le t’i lemë këto dhe të presim ditën dhe orën që Gjykata Kushtetuese të ngrihet dhe lidhur me këtë interpretim, qoftë edhe timin, le të shprehet ajo dhe atëherë të heshtim të gjithë.
Tashmë që PS ka maxhorancën e vetme, pse në qeveri kjo parti është gjithmonë e më pak e përfaqësuar, referuar ndryshimeve të reja qeverisëse që miratoi Kuvendi, ku njerëzit janë kryesisht teknikë dhe jo ekipi elektoral i PSsë?
Sistemi që jemi, është sistemi i partisë në pushtet, po kjo nuk do të thotë se kur je në pushtet, duhet të jenë anëtarët e forumeve dhe anëtarët e partisë në pushtet, madje është e gabuar. Çdo parti që vjen në pushtet, nuk vjen me votat e anëtarësisë së vet, se maksimumi, çdo parti në Shqipëri ka 100 mijë anëtarë, ndërkohë duhen mbi 700 mijë vota për të qenë në pushtet.
Opozita ju ka akuzuar në seancën e kaluar parlamentare se po silleni si partiakë dhe jo si kryetar i Kuvendit. A ndiheni përgjegjës për largimin e opozitës?
Asnjëherë nuk duhet thënë që drejtimi i Kuvendit është perfeksion, megjithatë, unë jam munduar që prej ditës së parë si kryetar Kuvendi, ta bëj detyrën pa marrë parasysh se nga ç’forcë politike vij. Kështu që, kërkesa e opozitës në seancën e kaluar të jashtëzakonshme ishte në kundërshtim me Rregulloren dhe me të gjithë precedentët parlamentarë të përdorur në 28 vjet. Cila është zgjedhja që bën opozita, qëndron apo jo në sallë, ajo është sovrane në vendimet e saj, unë nuk e paragjykoj, sepse është në të drejtën e saj.
A do t’i kërkonit maxhorancës që ta tërheqë këtë draft dhe e gjithë puna të finalizohet në Komisionin e Reformës Zgjedhore?
Unë nuk e kam përcjellë këtë draft as në programin e Kuvendit dhe as në kalendarin e Kuvendit. Kjo do të thotë se drafti është aty, në mënyrë që ta sjellë Komisioni ad hoc për Reformën Zgjedhore. Siç kam bërë apel gjatë sesionit të kalu- ar, përsëri edhe në prag të fillimit të këtij sesioni, apeloj që maxhoranca dhe opozita në Komisionin ad hoc të dialogojnë, të konkludojnë dhe ta depozitojnë në Kuvend dhe vetëm atëherë unë, si kryetar Kuvendi, do ta përfshij në Kryesinë e Kuvendit, në programin dhe në kalendarin e punimeve të Kuvendit.
A jeni penduar për zgjedhjen e Ilir Metës President?
Unë nuk jam pishman për votën që jap dhe për qëndrimet që mbaj në këtë çështje dhe, sigurisht, nuk kam pritur që Presidenti i Republikës, kushdo të ishte ai, edhe zoti Meta, të operojë gjatë përmbushjes së detyrës së tij sipas orekseve politike, elektorale apo partiake të asnjë pale. Kam pritur dhe pres që zoti Meta të zbatojë Kushtetutën si President i vendit dhe vetëm kaq. Për këtë nuk kam se pse të jem pishman, ashtu sikurse edhe kthimi i ligjeve, që është në kompetencën e tij, që me dekret i është drejtuar Kuvendit.
Disa ditë më parë, “Zëri i Amerikës” publikoi disa përgjime, ku deputetë të PS- së, përfaqësues të saj dhe drejtoresha e kabinetit të Kryeministrit implikohen në një ndërhyrje për sa u përket punësimeve?
Ju thashë që nuk bëj komente për komentet. Për mua është një gjë shumë e mirë që në Shqipëri çdo ditë e më shumë po forcohet dhe po konsolidohet statusi i administratës shtetërore. Kjo është një gjë shumë pozitive. Kështu që, komenti është ky: është një arritje pozitive e Shqipërisë, që së fundi edhe administrata shtetërore të mos lëvizë sipas partive, të cilat bëjnë rotacionin politik. A është e përkryer kjo?! Sigurisht që jo. Por kjo nuk do të thotë se administrata e shtetit apo punësimet në shtet bëhen mbi baza partiake.
A do të miratojë Parlamenti një ligj për Presidentin? Sepse, në kuadër të Reformës në Drejtësi është hartuar një draft dhe deri para pak muajsh ka qenë edhe në faqen zyrtare të Parlamentit.
Nuk ka ardhur një projektligj i tillë. Ai draft ka qenë shumë kohë më parë aty. Për këtë çështje kam dëgjuar edhe ankesa të ish- presidentëve, të cilët e kanë kërkuar. Në momentin që do të vijë, sigurisht që nga Kuvendi nuk do të ketë asnjë zvarritje për ta futur në procedurat parlamentare, për ta gjykuar dhe për ta vlerësuar projektligjin, i cili ende nuk ka mbërritur në Kuvendin e Shqipërisë.
Opozita ka lajmëruar protesta masive në të gjithë vendin, a kanë përgjegjësi Kuvendi dhe qeveria për krizën, në të cilën po hyn vendi?
Opozita nuk merr leje as nga unë, as nga ju që të zhvillojë protesta, është normë demokratike. Unë i përshëndes ato dhe do të ndikoj, në të gjithë hapësirat e mia institucionale, që të garantohet hapësira, legjitimiteti dhe normaliteti i këtyre aktiviteteve opozitare, por nuk mendoj se vendi ynë i përbashkët është në një krizë. Sigurisht, ka probleme, si në çdo vend në botë, si çdo vend demokratik, por e rëndësishme është që ato të njihen dhe hap pas hapi të zgjidhen.
Në hapësirën shqiptare ka një debat për korrigjimin e kufijve të Kosovës, që cilësohet si copëtim i Kosovës. Nga qeveria shqiptare ka një paqartësi për marrëveshjen Serbi- Kosovë. Sipas jush, cili do të jetë qëndrimi i shtetit shqiptar për këtë marrëveshje?
Unë nuk dua të bëhem pjesë e këtij debati. Shpeshherë, ne pozojmë duke thënë se kush është pro dhe kush është kundër. Së pari, Kosova është një shtet sovran, që ka institucionet e veta. Ne, si shqiptarë, si institucione të shtetit shqiptar, duhet ta respektojmë, duhet të mirëkuptojmë dhe të mbështesim zgjidhjet që duhet të japin institucionet e shtetit sovran të Kosovës. Së dyti, ajo që ne rekomandojmë apo që kemi si qëndrim është ky: në radhë të parë, institucionet e shtetit sovran të Kosovës duhet të kenë një mendim unik; në radhë të dytë, partitë politike në Kosovë të kenë një mendim unik për këtë çështje. Së treti, për institucionet e Kosovës, rruga e zgjidhjes së problemeve të Kosovës është rruga e dialogut si mjet. Së fundi, institucionet e shtetit sovran të Kosovës, çfarëdolloj produkti që do të kenë, duhet ta kenë të konsultuar me Brukselin dhe me SHBA- në.