Pedagogët e Filologjikut në grevë, Rama: S’e merrni dot peng Qeverinë
Marku: Të rrëzohet ligji i arsimit të lartë. VKM- të cenojnë autonominë
Kjo e hënë do t’i gjejë në grevë pedagogët e Fakultetit të Histori- Filologjisë. Vendimi është marrë unanimisht një ditë më parë në mbledhjen e Asamblesë. “Nuk ka pasur asnjë nga pedagogët pjesëmarrës që të jetë kundër një proteste paralajmëruese njëditore të pedagogëve. Hapat e tjerë do t’i përcaktojmë në përputhje me dinamikën e zhvillimit, me mënyrën sesi do të përgjigjet qeveria”, deklaroi pedagogu, njëherësh përgjegjës i Departamentit të Gazetarisë, Mark Marku. Në vendimin e zbardhur, pedagogët e universitetit shohin me shqetësim Vendimet e Këshillit të Ministrave, si dhe insistojnë për rrëzimin e ligjit të arsimit të lartë. “Ato vendime, në njëfarë mënyre pezullojnë edhe atë pak autonomi që ka ekzistuar deri më tani përmes ligjit. Kërkojmë abrogimin e ligjit”, thotë Marku. Në dokument citohet shprehimisht se aktet dhe urdhrat e qeverisë cenojnë rëndë autonominë e IAL- ve dhe liritë akademike të profesoratit, në autonominë në vlerësimin e punës shkencore dhe të karrierës akademike; liritë akademike të profesoratit në përcaktimin e përmbajtjes së njohurive që jepen në auditor, si dhe shkelin plotësisht konventat europiane për autonominë universitare dhe liritë akademike. Një tjetër problematikë e shprehur është edhe marrëdhënia e politikës me pedagogët, për të cilën Asambleja e fakultetit del me dy vendime. “Kërkojmë ndalimin e fushatës denigruese dhe të përbaltjes masive të trupës akademike universitare nga aktorë politikë dhe qeveritarë, që synon intimidimin e fjalës së lirë. Kërkojmë të sanksionohet me ligj statusi i pedagogut”. Rrëzimi i ligjit për arsimin e lartë vetëm pak ditë më parë është kërkuar dhe nga Asambleja e Fakultetit të Shkencave So- ciale, e cila gjithashtu është shprehur për hapjen e një debati të gjerë mes palëve të interesuara për modelin e universitetit publik në Shqipëri. Pedagogët e Filologjikut vijnë gjithashtu në të njëjtën linjë mendimi. “Në përgjigje të kërkesës së Asamblesë së personelit akademik të Fakultetit të Shkencave Sociale, Universiteti i Tiranës, propozojmë që përfaqësues të asambleve të personelit akademik të Universitetit të Tiranës të mblidhen për të koordinuar veprimet e mëtejshme”, thuhet në pikën 5 të vendimit. Nisur nga situata e krijuar, dita e parë e javës që vjen do të jetë grevë ditore paralajmëruese. Sakaq, në fakultetet ku ka të ngujuar, edhe dje ka vijuar përplasja midis studentëve që duan të bëjnë mësim dhe atyre që janë për bojkot. Te Fakulteti i Ekonomisë, Shkencave Sociale dhe Politeknikut ka bojkot masiv, ndërsa te Drejtësia, Gjuhët e Huaja dhe Shkencat e Natyrës ka edhe mësim, edhe protestë.