Meta shkarkon Bushatin dhe emëron Ramën te Diplomacia
“Dekretimi i Kryeministrit, për të shmangur përplasjen institucionale”
Presidenti Meta dekretoi dje shkarkimin e ministrit të Jashtëm, Ditmir Bushati, dhe emërimin e Kryeministrit Rama edhe në postin e ministrit.
Ashtu siç kishte paralajmëruar, kreu i shtetit, brenda afateve kushtetuese i dha përgjigje kërkesës së Kryeministrit për ndryshimin e drejtimit të diplomacisë shqiptare, ku nëpërmjet një njoftimi për shtyp dha edhe arsyet e këtij vendimi. Sipas njoftimit të Presidencës, theksohet se në Kushtetutë nuk është parashikuar që Kryeministri të marrë edhe postin e ministrit, por duke shtuar se ligji themeltar i shtetit as nuk e ndalon një gjë të tillë. “Presidentit të Republikës, më datë 14 janar 2019 i është paraqitur propozimi i ri për emërimin e z. Edi Rama, Kryeministër, edhe në funksionin e ministrit për Europën dhe Punët e Jashtme. Emërimi i Kryeministrit edhe në detyrën e ministrit është një rast i veçantë, që nuk parashikohet dhe as ndalohet nga Kushtetuta e Republikës së Shqipërisë. Presidenti i Republikës vlerësoi këtë propozim në përputhje me frymën që përcjell Kushtetuta dhe jurisprudenca e Gjykatës Kush- tetuese, duke bërë një interpretim të zgjeruar dhe fillestar të dispozitave kushtetuese, si dhe duke mbajtur në konsideratë faktin që ushtrimi i detyrës së ministrit nga Kryeministri është një veprimtari shtetërore, e cila shtrihet brenda sferës ekzekutive, pjesë e kabinetit qeveritar, struktura e të cilit është në të drejtën e Kryeministrit për t’u propozuar”, thuhet në njoftimin e Presidencës, ku theksohet gjithashtu se dekretimi i Ramës edhe në postin e ministrit të Jashtëm bëhet për të shmangur një përplasje institucionale ndërmjet ekzekutivit dhe Presidentit. “Në shqyrtimin e këtij propozimi, Presidenti i Republikës, në cilësinë e kreut të shtetit, ka mbajtur në konsideratë edhe rëndësinë e evitimit të çdo mundësie për krijimin e një krize institucionale, e cila do të dëmtonte pozitën e Republikës së Shqipërisë në marrëdhëniet ndërkombëtare”, thuhet në njoftimin e zyrës së shtypit të Presidencës. Në këtë mënyrë mbyllet edhe konflikti i parë ndërmjet Kryeministrit dhe Presidentit, pasi Rama ka paralajmëruar çuarjen në Gjykatë Kushtetuese të praktikës së ndjekur nga Meta për rastin Cakaj.