Berisha: Antikushtetues emërimi i Ramës edhe në postin e ministrit
Dekretimin e Kryeministrit Rama edhe në postin e ministrit të Jashtëm, Sali Berisha e ka cilësuar si antikushtetues. Nëpërmjet një postimi në faqen e tij në “Facebook”, Berisha shkruan se dita e dekretimit të Ramës edhe në postin e ministrit është një e premte e zezë, duke risjellë modelin e ish- diktaturës komuniste, ku Enver Hoxha ishte edhe ministër i Jashtëm. “Është një e premte e zezë në historinë e kushtetutshmërisë, të politikës së jashtme të Republikës së Shqipërisë dhe interesave kombëtare të shqiptarëve. Kjo është një e premte e zezë në historinë e kushtetutshmërisë dhe triumf i grushtit të shtetit brenda shtetit dhe kjo, sepse Kushtetuta e Shqipërisë, neni 102, pika ‘ d’ sanksionon se Kryeministri dhe jo zëv- endëskryeministri, ‘ kryen detyra te tjera te parashikuara ne Kushtetute e ne ligje’. Me këtë pikë të këtij neni, në arsyetimin më elementar do të thotë se Kushtetuta e kufizon Kryeministrin dhe jo zëvendësin e tij, të kryejë detyra të tjera përveç atyre që parashikohen në Kushtetutë dhe ligje. Kjo është një e premte e zezë në historinë e shtetit shqiptar të bazuar mbi vlerat e pluralizmit politik, pasi kjo ditë ktheu një model rrëqethës dhe të shëmtuar të shtetit monist të Pasluftës së Dytë Botërore, ku diktatori paranojak Enver Hoxha ishte edhe Kryeministër, edhe ministër i Jashtëm i shtetit të tij diktatorial. Kushtetuta e Shqipërisë në nenin e saj 100, pika 4, sanksionon se: ‘ Aktet e Keshillit te Ministrave janë te vlefshme, kur nenshkruhen nga Kryeministri dhe ministri propozues’. Kështu, që sot e tutje, të gjitha marrëveshjet ndërkombëtare të Shqipërisë, aktet dhe propozimet e Ministrisë së Jashtme që do miratohen në qeveri do kenë në njërën anë firmën dhe vulën e Kryeministrit Edvin, kurse në anën tjetër firmën dhe vulën e ministrit të Jashtëm”, shkroi Berisha.