Kryemadhi: Largimi i Ramës mision, edhe PS e zemëruar
"Të vendosur për t'u rikthyer dinjitetin shqiptarëve"
Lëvizja Socialiste për Integrim ka ndezur motorët për organizimin e protestës, që opozita pritet të zhvillojë javën e ardhshme kundër qeverisë.
Kryetarja e LSI- së, Monika Kryemadhi, në mbledhjen e Komitetit Kombëtar Drejtues, kërkoi një mobilizim total për të rrëzuar qeverinë e Edi Ramës. Sipas Kryemadhit, largimi i Edi Ramës do të thotë për rikthim të 400 mijë shqiptarëve që janë larguar, ulje të taksave dhe plotësim të kërkesave studentore. "Vendimi i opozitës së bashkuar është rrëzimi dhe largimi i Edi Ramës. Është një vendim, të cilin e kemi artikuluar herë pas here, por tashmë e kemi institucionalizuar. Sepse largimi i Edi Ramës do të thotë që të kthejmë 400 mijë shqiptarët, të cilët kanë ikur nga Shqipëria. Rrëzimi dhe largimi i Edi Ramës do të thotë që të ulim taksat, të cilat u janë ngritur shqiptarëve gjatë gjithë kësaj kohe. Rrëzimi dhe largimi i Edi Ramës do të thotë që të kemi një shëndetësi falas. Ose nëse nuk mundemi një shëndetësi falas, atë të cilën u ka premtuar Edi Rama, do të thotë që të kthejmë një shëndetësi të barabartë dhe jo me standarde të dyfishta. Por një shëndetësi të mirë dhe të detyrueshme për shqiptarët. Të rrëzosh dhe të largosh Edi Ramën, do të thotë që të plotësosh kërkesat e studentëve. Por jo vetëm kërkesat e studentëve, por edhe të ruash dhe të institucionalizosh integritetin e universitetit shqiptar dhe të pedagogëve shqiptarë", tha Kryemadhi.
PROTESTA Kryetarja e LSI- së deklaroi se forca e saj politike është e vendosur për të protestuar kundër Edi Ramës jo për rrotacion politik, por për një të ardhme më të mirë të shqiptarëve. "Sigurisht që aksioni opozitar kërkon vendosmëri dhe a jemi ne të vendosur? Sigurisht që jemi të vendosur! Jemi të ven- dosur më shumë se kurrë, jo për shkak të rrotacionit politik, jemi të vendosur jo për shkak të pushtetit politik të njërit apo tjetrit, por jemi të vendosur për të ardhmen e fëmijëve të shqiptarëve. Jemi të vendosur për të garantuar një të ardhme të garantuar për shqiptarët. Jemi të vendosur për të kthyer Shqipërinë në shtëpinë e shqiptarëve. Jemi të vendosur për ta vendosur aksionin politik aty ku duhet dhe për t'u kthyer dinjitetin shqiptarëve", theksoi kryetarja e LSI- së. Duke qenë e bindur për pakënaqësi me qeverisjen e Edi Ramës edhe në radhët e PS, Kryemadhi kërkoi që t'i shtrihet dora çdo socialisti që kërkon t'u bashkohet protestave. "Na duhet zgjimi i anëtarëve të LSI- së, por përveç zgjimit të tyre, ne duhet të jemi shumë të hapur dhe shumë mikpritës ndaj një fluksi të jashtëzakonshëm njerëzish që vijnë nga PS, anëtarë të PS- së, votues të PS- së, të cilët ndihen të zemëruar. Ndihen të zemëruar, për shkak të mashtrimit që ka ardhur si rezultat i lidershipit të Rilindjes dhe ndihen të zemëruar edhe për shkak të përballjes së tyre me elektoratin, sepse nuk kanë më çfarë t'u thonë", tha Kryemadhi.