Pronat me 7501, si do ndahen tapitë e reja

Ekspertja në Ministrinë e Bujqësisë sqaron procedurat e reja për marrjen e tapisë. Rastet kur përjashtohet hipotekimi dhe si do të verifikohen titujt e dhënë

Ligji i ri i pronave do të sjellë edhe ndryshim të procedurave për marrjen e certifikatës së pronësisë për ata fermerë, që kanë në përdorim tokë bujqësore të ndarë me ligjin 7501.

Përgjegjësja për tokën bujqësore në Ministrinë e Bujqësisë, Majlinda Bozgo, thotë se qëllimi i ndryshimeve ligjore është lehtësimi i procesit me qëllimin e vetëm për t'i shkuar deri në fund kësaj odiseje çerekshekullore. "Të gjitha institucionet e pronësisë do të bëhen bashkë për të pasur një koordinim më të mirë të veprimeve. Procesi nga fillimi, pra nga dhënia e titullit deri në dhënien e certifikatës, do të kryhet brenda të njëjtit institucion, që do të jetë Agjencia Shtetërore e Kadastrës. Për procese që kanë të bëjnë me titujt e pronësisë mbi tokën bujqësore ka disa akte nënligjore, që do të detajojnë procedurën dhe dokumentacionin e nevojshëm, natyrisht edhe afatet. Qëllimi i kësaj qeverie është të lehtësojë edhe më tepër këtë praktikë, për t'i shkuar deri në fund këtij procesi", shprehet Bozgo.

VERIFIKIMET Lidhur me verifikimet e tituj të pronësisë, aktualisht janë komisionet e verifikimit të ngritura pranë prefekturave, ato të cilat e kryejnë këtë proces të diktuara nga ankesat. Por në ligjin e ri, kjo do të jetë kompetencë e Agjencisë Shtetërore të Kadastrës. E pyetur mbi kriteret që do të aplikohen, Bozgo sqaron se do të ketë lehtësira. Por pavarësisht kësaj, duket se sërish do të ketë pasuri, të cilat do të përjashtohen nga procesi. Bëhet fjalë për vijën bregdetare, si edhe ato pasuri që preken nga infrastruktura. "Nuk do të verifikohen të gjithë titujt. Gjatë procesit të përditësimit dhe përmirësimit të materialeve hartografike, nëse punonjësit që do të bëjnë regjistrimin fillestar do të vërejnë parregullsi, atëherë do të bëhen korrigjimet e nevojshme. Verifikimi do të kryhet nga Agjencia Sh- tetërore e Kadastrës, mbi bazën e kritereve të vendosura në ligj. Natyrisht që kriteret janë më të lehtësuara, po t'i referohemi llojit të zërit kadastral. Më parë ishte vetëm toka bujqësore ( arë, vresht, ullishte, pemishte). Në dijeninë time, duke qenë se ligji ako- ma nuk ka marrë formën përfundimtare, do të përjashtohen vetëm bregu i detit, ranishtat, plazhet, infrastruktura, pra rrugët apo infrastruktura e ujitjes dhe kullimit", bën me dije përgjegjësja për tokat bujqësore në Ministrinë e Bujqësisë.

ABUZIMET Siç ndodh aktualisht edhe pas zyrtarizimit të ligjit "Për përfundimin e proceseve kalimtare të pronësisë", sërish fjalën e fundit do ta thotë gjykata për rastet që do të konstatohen në shkelje ligjore. "Natyrisht, do të ndiqet procedura gjyqësore për çdo rast. Pasi, referuar vendimit të Gjykatës Kushtetuese të vitit 2010, asnjë titull pronësie nuk mund të hiqet në rrugë administrative pa iu nënshtruar një procesi të rregullt ligjor", thekson më tej Bozgo. Sipas saj, ligji parashikon një afat 3- mujor nga data e hyrjes në fuqi për kërkesat e reja. Meqenëse projekti i ri i ka lehtësuar kriteret e përfitimit, shumë familje të cilave iu është refuzuar kërkesa me legjislacionin e vjetër, do të kenë mundësi të riaplikojnë.