Rama premton kampusin e ri: Përfundon mandatin tjetër bashkiak
Kryebashkiaku: 11 godina të reja
Kampusi i ri për studentët do të përfundojë brenda mandatit tjetër bashkiak.
Këtë siguri e dha Kryeministri Edi Rama, një ditë më parë, gatë prezantimit të projektit për Kampusin Universitar. "Ajo që mbetet ambicia jonë, është që brenda këtij mandati, të gjitha konviktet të jenë në një situatë katërçipërisht ndryshe dhe ndërkohë, së bashku me Bashkinë e Tiranës, ne të fillojmë ndërtimin e këtij Kampusi dhe brenda mandatit tjetër të kryetarit të Bashkisë, ne të përfundojmë Kampusin Universitar". Me këtë deklaratë, shefi i qeverisë ka qartësuar zërat se Partia Socialiste po shikonte një kandidat tjetër për t'i besuar bashkinë më të madhe në vend. I shoqëruar nga kreu i Bashkisë së Tiranës, Kryeministri inspektoi më pas punimet e nisura për përmirësimin e infrastrukturës së godinave në Qytetin Studenti, si pjesë e Paktit për Universitetin.
INVESTIMI
Edhe pse diheshin kushtet në konvikte dhe koha kur ishte vënë dorë së fundmi, përmirësimi i infrastrukturës së konvikteve ka qenë një plan i hershëm i qeverisë, që ka marrë kohën e duhur për t'u konkretizuar tanimë edhe falë shtysës që mori nga studentët. "Ne nuk kemi pritur protestën për t'u kujtuar se ka konvikte, se ka probleme, se ka nevoja. Sigurisht që nuk kemi bërë dhe nuk kemi mundur dot, edhe sikur të donim, nuk do mundnim dot të bënim aq sa duhej, për të qenë sot të qetë në raport me ju. Por, ama, në vitin 2015 kemi organizuar këtë konkurs, në vitin 2014, unë e kam shtruar me Kancelaren gjermane kërkesën që sot na ka dhënë mundësinë të kemi financimin e Bankës Gjermane për Zhvillim, për ndërtimin dhe rindërtimin e konvikteve", nënvizoi Kryeministri Rama, teksa bëri me dije se konviktet në Qytetin Studenti nr. 2 janë drejt përfundimit dhe se shumë shpejt pritet të negociohet edhe për një grup tjetër konviktesh.
LIGJI I ARSIMIT
Të gjitha problemet, për të cilat ende vijohet të protestohet, Rama thotë se nuk e ka fajin ligji i hartuar dhe implementuar në 2015- ën nga qeveria e tij. Përkundrazi, ai ka vendosur bazat e një procesi transformimi përfundimtar të arsimit. "Kontradikta mbi ligjin e arsimit të lartë është një kontradiktë që nuk rri as në qiell, as në tokë. Është njësoj si të thuash meq- enëse njerëzit nuk lidhin rripin e sigurimit, të heqim ligjin për rripin e sigurimit dhe të bëjmë një ligj tjetër, që t'i lidhim, nuk e di në çfarë forme, njerëzit. Ligji i arsimit të lartë duhet zbatuar dhe ata që e kundërshtojnë, i kam dëgjuar me shumë vëmendje, nuk thonë asgjë, zero, se ku dhe për çfarë i pengon ligji". Ky vit do të shërbejë, sipas kreut të qeverisë, për inventarizimin e nevojave për ta konkluduar me projekte, për të cilat do të nevojitet më shumë kohë. Rama nënvizoi fort se Pakti për Universitetin nuk përfshin vetëm kryeqytetin, por edhe IAL- të në rrethe. "Dua t'i siguroj të gjithë ata që kanë shprehur shqetësimin dje, që mos vallë Pakti për Universitetin i kufizon partneritetet e ministrive vetëm në Tiranë, jo kjo nuk është e vërtetë. Do të kemi një komponent edhe për universitetet e rretheve".