Nishani rikthehet në PD, Bardhi, Sekretar i Përgjithshëm
Fitojnë Gjata, Dollapi e Minarolli, rikonfirmohet Kaso
Ish- Presidenti, Bujar Nishani, do të mbajë postin e kryetarit të Këshillit Kombëtar të PDsë për 4 vitet e ardhshme. Ftesa e kreut të PD- së, Lulzim Basha, për ta rikthyer ish- kreun e shtetit në politikën aktive është mirëpritur nga anëtarët e Këshillit Kombëtar të PDsë, të cilët e votëbesuan Nishanin në krye të njërit prej organeve më të larta të forcës së tyre politike. Ish- ministri i Drejtësisë dhe këshilltari ligjor i PD- së, Gazment Bardhi, me 277 vota u zgjodh si Sekretar i Përgjithshëm i Partisë Demokratike përballë Doriant Telitit, i cili mban aktualisht detyrën e Këshilltarit Ekonomik. Pavarësisht se i ri në politikën aktive, Bardhi ka qenë protagonist kryesor këto vite të PD- së në opozitë. Sekretari i ri i Përgjithshëm i demokratëve në rolin e ekspertit të PD- së në Reformën në Drejtësi denoncoi një sërë nenesh, të cilat, sipas tij, do të sillnin kapjen e drejtësisë nga qeveria. Gjithashtu, Bardhi ka qenë ideator dhe ka pasur kontribut të drejtpërdrejtë në hartimin e ligjit të dekriminalizimit dhe së fundmi me nismën kushtetuese për vetingun në politikë. Bardhi gjatë vitit që lamë pas ishte pjesë e grupit të ligjvënësve demokratë, që denoncuan vëllain e ish- ministrit të Drejtësisë, Fatmir Xhafaj. Në krye të Sekretariatit për Çështjet Ligjore u zgjodh juristi dhe ish- kreu i KQZ- së, Çlirim Gjata. Njësoj si në garën për Këshillin Kombëtar, Gjata faktoi mbështetjen e gjerë që ka në radhët e demokratëve, të cilët e votëbesuan me 284 vota. Sahit Dollapi do të jetë Sekretari i ri Organizativ i PD- së. Ishadministratori i CEZ gjatë qeverisjes së PDsë fitoi në garën përballë Lulzim Omurit. Çështjet zgjedhore në PD do të jenë sërish kompetencë e juristit Ivi Kaso, i cili u rizgjodh në krye të Sekretariatit për Çështjet Zgjedhore, ndërkohë që Ervin Minarolli do të drejtojë për 4 vitet e ardhshme sekretariatin për Burimet Njerëzore.