Veliaj shpjegon projektin: 11 godina të reja e një megabibliotekë
Kampusi i ri Universitar do t'i shtojë Qytetit Studenti 11 godina të reja, të cilat do të ndërtohen nga e para, ndërsa ekzistueset do t'i nënshtrohen rikonstruktimit. Këto të fundit do të jenë në dispozicion jo vetëm të studentëve shqiptarë, por dhe atyre të huaj, që vijnë për të studiuar falë programeve të shkëmbimeve. Detajet e projektit të Kampusit Universitar të shumëpremtuar i shpjegoi kryebashkiaku Erion Veliaj. "Ajo që konsiston në kampusin e ri ka të bëjë së pari me shtimin e 11 godinave të tjera në Qytetin Studenti. Disa godina janë përtej riparueshmërisë dhe një, për shembull, që është identifikuar e parikonstrukturueshme do të rrëzohet dhe do të ndërtohet nga e para, por në total do të kemi 11 godina të reja, të cilat nuk duam vetëm të përdoren nga studentët këtu në Shqipëri, por nga ata që vijnë me programet Erasmus". Një bibliotekë e madhe, mensë dhe terrenet sportive janë tri elemente të reja, për të cilat kanë nevojë të rinjtë dhe që në pak vite do t'i kenë në qytetin e tyre. "Planifikojmë që të ndërtojmë një megabibliotekë për Qytetin Studenti. Unë e di që në miniaturë ka salla leximi që po i rikonstruktojmë në secilën prej konvikteve, ama një hapësirë më të madhe sot nuk e kemi dhe planifikohet në Kampusin e ri Universitar. Tjetra është mensa. Pjesa e tretë po aq e rëndësishme ka të bëjë me terrenet sportive dhe me të gjithë hapësirat çlodhëse rreth Qytetit Studenti", nënvizoi kreu i bashkisë. Lidhur me konviktet që i kanë kaluar së fundmi institucionit që drejton, Veliaj kërkoi një dorë të mirë nga bizneset falë nismës, të cilën ka ditë e që apelon në media: "Adopto një konvikt". "Me insistimin e Kryeministrit, kemi filluar që të lëvizim, së pari me një fond special që qeveria akordoi do të fillojmë edhe prokurimin e atij fondi, por nuk mund të prisnim. Kemi filluar edhe pak më herët me një koncept që ne e provuam me sukses për adoptimin e kopshteve dhe çerdheve të Tiranës. Me insistimin e Kryeministrit, ishte TIKA që na u përgjigj e para për të filluar një nga konviktet e djemve dhe ndërkohë kanë marrë një angazhim për disa të tjera dhe le të themi sot, vetëm në këtë fazë emergjente në gjysmën e konvikteve të Qytetit Studenti i kemi kthyer në kantiere pune".