Kreu i Hipotekave, reprezalje në Shkodër: Nuk ka të paprekshëm
Valdrin Pjetri: Kush nuk jep shërbim për 48 orë, do përgjigjet
Pas një sërë arrestimesh të bujshme nga juristë e deri në nivel drejtues, kreu i Hipotekave ka nisur analizën vjetore nga një takim në qytetin më problematik.
Kryeregjistruesi, Valdrin Pjetri, i cili duket se e njeh mirë realitetin në qarkun ku ka lindur, ka bërë paralajmërime të qarta për të gjithë punonjësit e Hipotekës në Shkodër. Pjetri tha se janë marrë disa masa dhe hapa konkretë për të luftuar korrupsionin dhe për të dhënë një shërbim më të mirë për qytetarët. Ai tha se tashmë 9 shërbime kryesore që zënë 57% të nivelit të punës në Hipotekën e Shkodrës do të mund të merren për 48 orë. “Jemi këtu në Shkodër, pasi 2018 nuk ishte një vit i mirë për Zyrën e Regjistrimit të Pasurive këtu, pasi kemi pasur disa arrestime për korrupsion. Kjo është edhe një prej arsyeve që unë e nis analizën këtë vit nga Shkodra, për të dhënë mesazhin e qartë që gabimet e bëra nuk do të duhet të përsëriten. Asnjë punonjës nuk është i paprekshëm. Ne tashmë kemi ofruar 9 shërbime kryesore që qytetarët do t’i marrin për 48 orë. Këto shërbime që nisin që nga kontratat e shitjes apo kartelat e pasurisë, por edhe të tjera në Shkodër kanë zënë 57% të volumit të punës dhe në rang kombëtar zënë rreth 50%. Ky është një urdhër i imi që të gjithë janë të detyruar ta zbatojnë. Tashmë kemi sportele të veçanta, dedikuar vetëm për këto shërbime dhe, nëse punonjësi nuk jep shërbimin për 48 orë, atëherë do të mbajë përgjegjësi”, deklaroi Pjetri, duke shtuar se një vendim i tillë është bërë për të luftuar korrupsionin, pasi shfrytëzoheshin afatet për të marrë ryshfet. Nëse ndonjë qytetar has probleme të tilla, tha ai, mund të bëjë denoncim. Pas analizës, ai foli edhe për disa problematika të tjera, duke thënë se ligji i ri pritet që të përmirësojë çështjen e mbivendosjes apo se është shtuar numri i dosjeve të legalizimeve dhe se bashkimi i Hipotekës në një institucion të vetëm me ALUIZNI- n do të lehtësojë punën për qytetarët. “Mbivendosja e pronave është një problem i trashëguar ndër vite, por ne shpresojmë që me ligjin e ri kjo çështje do të marrë një zgjidhje dhe ne po punojmë maksimalisht për këtë gjë. Natyrisht që nuk e kemi të lehtë sepse mund të ketë prona që kanë dytre tituj pronësie dhe zyrat tona e kanë të vështirë në këto raste për të dhënë përgjigjen e duhur dhe në këto raste padyshim që nevojitet koha e duhur fizike për të dhënë një përgjigje të saktë për qytetarin. Sa i përket legalizimeve, shoh që këtu në Shkodër janë përgatitur një numër i konsiderueshëm dosjesh dhe ne ftojmë të gjithë qytetarët që të vijnë dhe të aplikojnë sepse do të marrin shërbimin që kërkojnë dhe me shpejtësi”, deklaroi Pjetri. Pas analizës vjetore në Hipotekën e Shkodrës, Kryeregjistruesi Pjetri zhvilloi një takim me noterët e qytetit të Shkodrës për të diskutuar mbi problemet që kanë si dhe për të arritur në zgjidhjen e tyre gjatë këtij viti.