Kodi, Ruçi: S’do kaloj asnjë draft pa konsensus
"Mungesa e vullnetit politik na ka lënë pa Kodin e ri Zgjedhor"
Kryetari i Kuvendit Gramoz Ruçi kërkoi konsensus për Reformën Zgjedhore nga maxhoranca dhe opozita. Në daljen e tij para mediave pak ditë më parë, i pyetur nëse do të kalojë në procedurë parlamentare draftin e përgatitur nga ekspertët e huaj dhe të dakordësuar nga maxhoranca, Ruçi tha se do ta çojë në komisione dhe në seancë vetëm kur drafti të ketë dakordësinë dhe konsensusin e palëve. "Unë nuk e kam përcjellë këtë draft as në programin e Kuvendit dhe as në kalendarin e Kuvendit. Kjo do të thotë se drafti është aty, në mënyrë që ta sjellë Komisioni ad hoc për Reformën Zgjedhore. Siç kam bërë apel gjatë sesionit të kaluar, përsëri, edhe në prag të fillimit të këtij sesioni, apeloj që maxhoranca dhe opozita në Komisionin ad hoc të dialogojnë, të konklu- dojnë dhe ta depozitojnë në Kuvend dhe vetëm atëherë, unë si kryetar Kuvendit, do ta përfshij në Kryesinë e Kuvendit, në programin dhe në kalendarin e punimeve të Kuvendit", tha Ruçi. Sipas tij, ka qenë mungesa e vullnetit politik që vendi ka mbetur pa një Kod të ri Zgjedhor. Ai u bëri thirrje forcave politike të gjejnë konsensus. "Dua të them se vetëm mungesa e vullnetit politik ka bërë që ky objektiv shumë i rëndësishëm, që ka pasur Kuvendi, nuk është realizuar. Kështu që, unë i bëj thirrje si opozitës edhe maxhorancës, që ditët që kanë mbetur të mos kthehen në muaj, pasi qershori është shumë afër", tha Ruçi. Kryetari i Kuvendit kërkoi miratimin sa më parë të Reformës Zgjedhore, mbi të cilën do të punojë dhe Komisioni Qendror i Zgjedhjeve për zgjedhjet vendore. "Komisioni Qendror i Zgjedhjeve ka nevojë për librin e rregullave dhe ndryshimet që Kuvendi do të bëjë dhe Kuvendi duhet t'i përmbushë sa më shpejt të jetë e mundur, sepse është edhe një ndër objektivat në përmbushjen e objektivit madhor që kemi të gjithë së bashku, siç është hapja e negociatave në qershor të 2019- ës", tha kryetari i Kuvendit.