Kuvendi rifillon punë me votimin e Ramës ministër
Sot zhvillohet seanca, opozita s'ka qëndrim për pjesëmarrjen
Parlamenti do të fillojë sot zyrtarisht punën pas pushimit trejavor të vitit të ri. Kryetari i Kuvendit, Gramoz Ruçi, ka firmosur urdhrin për mbledhjen e Kuvendit në seancë plenare, e cila ndryshe nga herët e tjera që ka qenë thjesht formale, këtë herë do të fillojë me votime. Sipas njoftimit të publikuar në faqen e Kuvendit, pjesë e rendit të ditës pritet të jetë edhe votimi për dekretet e Presidentit Meta, që i japin fund lëvizjes në krye të Ministrisë së Jashtme, duke miratuar largimin e Ditmir Bushatit dhe caktimin në vend të tij të vet Kryeministrit Rama. Krahas kësaj, deputetët do të votojnë nesër edhe kalendarin e punimeve të Kuvendit, ku sipas të gjitha gjasave, do të futen edhe ligjet e kthyera mbrapsht nga ana e Presidentit Meta. Opozita nga ana e saj nuk e ka konfirmuar ende nëse do të marrë pjesë në seancën plenare. Burime nga kampi opozitar bënë me dije se Partia Demokratike do të zhvillojë sot një mbledhje për të marrë vendimin nëse do të bojkotojë seancën apo jo, ndërsa LSI- ja ka një qëndrim më të zbutur përkundrejt bojkotit, e cila ka shprehur gatishmërinë për të zhvilluar betejën edhe në sallën e Kuvendit. Rifillimi i punës se Kuvendit, përveç mbylljes së ciklit të ndryshimeve në Qeveri, do të mbushë edhe vakancat e krijuara në komisionet parlamentare nga ministrat rinj. Në vend të zëvendëskryeministrit Erion Braçe, Komisionin e Ekonomisë dhe Financave do ta drejtojë ish- ministri i Financave, Arben Ahmetaj. Ish- ministri i Bujqësisë, Niko Peleshi, pritet të marrë drejtimin e Komisionit të Veprimtarisë Prodhuese, në vend të Eduard Shalsit. Ministri i ri i Bujqësisë, Bledi Çuçi, lë bosh dy detyra parlamentare, atë të bashkëkryetarit të Reformës Zgjedhore, ku do të zëvendësohet nga Blerina Gjylameti, si dhe postin e zv. kryetarit të Komisionit të Integrimit, për të cilin ende nuk është caktuar zëvendësuesi. Dy kandidaturat më të mundshme, pohojnë burimet pranë mazhorancës, janë ish- minis- tri i Jashtëm, Ditmir Bushati, ose deputeti Ervin Bushati. Një tjetër vend që mbetet bosh është ai i numrit dy të Komisionit të Shëndetësisë, ku ministrja e re për Marrëdhëniet me Parlamentin, Elisa Spiropali, pritet të zëvendësohet nga deputetja socialiste, Klodiana Spahiu.