Djali vrau nusen, prindërit: Duam kujdestarinë e fëmijëve
“Duam që ta mbajmë familjen e djalit të bashkuar e të gjallë”
Djali vrau nënën dhe tezen, prindërit e Gazmend Mustës kërkojnë kujdestarinë e dy fëmijëve të mitur.
Pas vrasjes dhe mërisë mes dy krushqive, do të lindë një konflikt i ri. Bëhet fjalë për fëmijët e çiftit Gazmend Musta – Gentjana Çaushaj nga Ballshi. Pasi Gazmendi ekzekutoi të shoqen dhe motrën e saj Merisa Çaushaj, në udhëkryq mbeten dy të miturit, të cilët, veç të tjerash, u përballën me skenën makabre të vrasjes së nënës dhe tezes së tyre. Disa ditë pas ngjarjes së rëndë, vëllai i viktimave kërkoi kujdestarinë e vogëlusheve, por fill një javë më pas, prindërit e vrasësit kanë drejtuar të njëjtën kërkesë në Gjykatë. Kjo duket se është një tjetër mollë sherri mes dy familjeve që rrezikon të mos mbyllet lehtë. Ndryshe nga ngjarjet e tjera, kur në të shumtën e rasteve, fëmijët i ka mbajtur familja e viktimës, këtë herë organi gjyqësor do të ketë vendimmarrje të vështirë. Në dyert e Gjykatës së Fierit ka mbërritur dje babai dhe nëna e autorit të ngjarjes, Bedri e Lumturi Musta. Këta të fundit i kanë dorëzuar një kërkesë Gjykatës, duke i kërkuar kujdestarinë e fëmijëve të djalit, sepse, sipas Bedriut, kjo familje i ka të gjitha mundësitë që t’i rrisë e t’i edukojë siç duhet fëmijët e djalit. Po ashtu, në deklaratën e tij për mediat, Bedriu ka thënë se në këtë mënyrë ai do të mbajë gjallë e të bashkuar familjen e të birit. “Dal për herë të parë të flas për mediat sepse sapo kam dorëzuar kërkesën time për të përfituar kujdestarinë e dy fëmijëve të mitur të djalit tim. Si prind dhe si gjyshi i dy fëmijëve, me bindje e kërkoj kujdestarinë e fëmijëve të djalit tim. Prandaj edhe iu drejtova Gjykatës së Shkallës së Parë në Fier që të marr kujdestarinë e fëmijëve. Dua që ta mbaj familjen e djalit të bashkuar e të gjallë”, ka thënë ai. Prindërit e Gazmend Mustës duket se po kërkojnë të shfrytëzojnë gjendjen më të mirë ekonomike se sa familja e dy viktimave për të fituar në Gjykatë. “Kriteret për të mbajtur fëmijët i plotësojmë, që t’i mbajmë të lumtur të shëndetshëm dhe të shkolluar. Unë kam besim të plotë te Gjykata, e cila do të vendosë se kush i plotëson kushtet e fëmijëve për t’i marrë”, është shprehur më tej ai. Por më herët, Gjyshmir Çaushaj, vëllai i Gentjanës dhe daja i fëmijëve ka depozituar një kërkesë në Gjykatë me po të njëjtin pretendim. Ai i ka kërkuar Gjykatës së Shkallës së Parë Fier, kujdestarinë e dy fëmijëve të mitur të motrës së tij. Sipas vëllait të viktimave, Gazmend Musta nuk mund të ushtrojë kujdestarinë e dy fëmijëve. “Gazmend Musta nuk mund të ushtrojë kujdestarinë e dy fëmijë”, u shpreh ai. Prej disa kohësh, çifti jetonte në një banesë me qira në lagjen “5 Shkurti” në Ballsh. 34- vjeçari Gazmend Musta për disa vite ka qenë emigrant në Greqi. Ngjarja e datës 2 janar dyshohet se kishte si shkak debatet e vazhdueshme në çift. Besohet se kërkesa e Gentjanës për të vizituar prindërit ka nxitur një sherr që më pas përfundoi me vrasjen e saj dhe të motrës. Gazmend Musta para Gjykatës së Krimeve të Rënda në Tiranë pranoi krimin e rëndë, duke thënë se kishte humbur kontrollin, pasi e shoqja e kishte fyer disa herë pas refuzimit të tij për ta lënë që të shkonte për vizitë te prindërit në Mallakastër. “Gruaja nisi të më ofendonte. Nuk i durova dot më dhe pas kësaj nuk di çfarë kam bërë”, ka thënë ai gjatë marrjes në pyetje. Sipas Prokurorisë, sherri mes çiftit ka ndodhur vetëm pak minuta pasi nga shtëpia e tyre është larguar motra e Gazmendit me bashkëshortin e saj.