Protestat e dhunshme në Athinë, plagosen policët
Protestues me zjarrvënës tentuan të hynin në Parlament
Përkrahës të opozitës kanë protestuar në Athinë gjatë ditës së diel për të kundërshtuar marrëveshjen mes qeverisë së Shkupit dhe Athinës për emrin, në një tubim paqësor të kthyer në përleshje të dhunshme me policinë.
Dhjetëra mijëra protestues të dhunshëm kërkonin të hynin në ndërtesën e Parlamentit të dielën, duke përdorur shkopinj, zjarrvënëse dhe objekte të tjera të rrezikshme, për të sulmuar oficerët që ruanin ndërtesën. Tubimi i thirrur pak ditë para se Parlamenti grek të votojë për ratifikimin e një marrëveshjeje për të riemëruar fqinjin verior të vendit si Maqedonia e Veriut, ishte paqësor në pjesën më të madhe. Por rreth orës 13: 00 me orën lokale, nisën përplasjet dhe pamjet në mediat sociale tregonin policinë duke përdorur gaz lotsjellës ndaj disa demonstruesve. Policia tha se 10 oficerë ishin plagosur në përleshje. Organizatorët e tubimit thanë se protesta e së dielës mund të jetë një nga më të mëdhatë e tyre, me 600,000 pjesëmarrës. Por Policia vlerësoi se pjesëmarrja ishte afërsisht 60,000 vetë. Greqia e ka kundërshtuar shumë emrin “Maqedoni” për fqinjin e saj verior, duke thënë se kjo nënkuptonte aspiratat territoriale mbi një rajon të veriut grek, me të njëjtin emër. Sipas marrëveshjes së nënshkruar nga Athina dhe Shkupi në qershor, Maqedonia do të ndryshojë emrin e saj në Maqedonia e Veriut dhe Greqia do të heqë veton ndaj anëtarësimit të saj në NATO dhe BE. Parlamenti maqedonas e ratifikoi këtë muaj, por duhet të miratohet edhe nga ligjvënësit grekë. Priftërinjtë dhe politikanët e krahut të djathtë ishin midis protestuesve në Athinën qendrore të dielën, me flamuj grekë dhe slogane “Maqedonia është greke”. Kundër- protestues të majtë u mblodhën në Athinë, duke bërë që policia të përdorë autobusë për të krijuar një pengesë fizike mes dy grupeve.