Plani B i Brexit, sot para Parlamentit britanik
Kryeministrja britanike, Theresa May, po finalizonte planin e saj B për Brexit mbrëmjen e së dielës, pasi sekretari i saj i Tregtisë paralajmëroi deputetët e kampit “Qëndro në BE”, se ata nuk mund ta grabisin Parlamentin për të vjedhur rezultatin e referendumit 2016. Kryeministrja May ka folur me anëtarët e kabinetit të saj, ndërsa përgatitet për një ditë të rëndësishme të hënën, kur ajo duhet të përcaktojë hapat e saj të ardhshëm mbi planin e Brexit. Për shkak se marrëveshja e saj e parë u refuzua të martën, May duhet të paraqesë një mocion të ri. Kryeministrja do të nisë një përballje të re në Parlament për votimin e 29 janarit, kur deputetët të thonë fjalën e tyre mbi një plan të modifikuar për Brexit. Një mundësi e diskutuar të dielën ishte një traktat dypalësh me Irlandën për mbajtjen hapur të kufirit irlandez, me qëllim të zëvendësimit të planit të ndalimit doganor në marrëveshjen e tanishme të refuzuar nga deputetët. Por kjo mundësi është refuzuar nga Dublini. Përpara deklaratës së May për deputetët të hënën, disa grupe të rebelëve të kampit “Qëndro” duan të përdorin votat për të pezulluar rregullat normale të Parlamentit dhe për të detyruar me ligje të reja parandalimin e opsionit “Brexit pa marrëveshje”. Manovrat procedurale nxitën sekretarin Liam Fox të paralajmëronte rebelët kundër çdo përpjekjeje për të rrëmbyer procesin e Brexit. Të dielën është pretenduar se Kryeministrja May mund të ofrojë dorëheqjen që marrëveshja të miratohet dhe të zbatohet me idetë e ndihmësit të saj më të mirë, Gavin Barwell, sipas “Daily Mail”.