Basha e quan Qeveri si të Enver Hoxhës, Rama: T’i shkatërrove PD
Reforma Zgjedhore, PD: Dekriminalizimi dhe vetingu në politikë, kusht i panegociueshëm
Fillimi i sesionit të ri parlamentar risolli edhe akuzat në foltoren e Kuvendit. Kryetari i Partisë Demokratike, Lulzim Basha, nga salla e Parlamentit akuzoi qeverinë se është e lidhur me krimin e organizuar.
Sipas tij, në vend është asgjësuar e drejta e votës për shkak të lidhjes së politikës me grupet kriminale. “U asgjësuan zgjedhjet, u asgjësua e drejta e votës, e drejta elementare e qytetarëve në demokraci për të përzgjedhur me votë ata që do t’i përfaqësojnë në këtë sallë, ata që do të mund t’i mbrojnë interesat e tyre në këtë sallë, ata që do të munden nga kjo sallë të kalojnë ligje e të miratojnë vendime, që do t’ua bëjnë jetën e tyre pak më të lehtë e jo më të vështirë. U asgjësua Kuvendi. Sot, kjo sallë nuk përfaqëson interesin publik, sepse ata që kanë sot forcën e kartonëve, e morën atë përmes forcës së krimit. Dhe sot e gjithë ditën mbrojnë vetëm krimin dhe favoret e tij. Ky Kuvend sot përfaqëson vesin më të shëmtuar në 28 vite pluralizëm. Antivlerën e ngritur në piedestal, hajdutërinë e përzier me arrogancën dhe nënçmimin e të pamundurve”, tha kryetari i PD- së. Në vijim të fjalës së tij, Basha theksoi se janë asgjësuar institucionet kryesore të drejtësisë. Basha u ndal edhe te ministrat e rinj në kabinetin qeveritar, duke e cilësuar emërimin e tyre si kapje të PS- së. “U asgjësua Gjykata Kushtetuese, mbrojtësja e vetme e garancive kushtetuese, qytetarëve shqiptarë dhe proceseve politike. U asgjësua këtu nga kjo sallë Prokuroria. Tani i erdhi radha edhe asgjësimit të Partisë Socialiste. Sot në pushtet ka vetëm një njeri, që qeveris me një grusht oligarkësh dhe kriminelësh, të cilët kontrollojnë të gjitha pushtetet në vend, jashtë çdo kontrolli, jashtë çdo procesi politik. Sot, ministra në pushtet, nuk janë më as përfaqësues të popullit, as përfaqësues të Partisë Socialiste, kundërshtarit tonë historik. Sot në Shqipëri ka vetëm një pushtet, pushteti personal i Edi Ramës. Shikojini pak këta njerëz ( kthehet nga poltronat ku rrinë ministrat), më thoni, a i dini emrat e disave prej tyre?”, u shpreh Basha. Kryetari i PD- së akuzoi Kryeministrin Rama, duke theksuar se po vepron si Enver Hoxha tashmë që ka marrë dy pozicione në qeveri. “Bëri sikur imitoi Ismail Qemalin dhe Hasan Prishtinën, por i ra fasada dhe doli si Enver Hoxha, edhe Kryeministër, edhe ministër i Jashtëm. Nivelin e kabinetit të Surrelit e ka të nivelit të Enver Hoxhës, Lenka Çukos dhe të Pali Miskës. Kështu e ka. Asgjë e mirë natyrisht, nuk mund të vijë nga kjo. Faturën për këtë vazhdon ta paguajë populli”, deklaroi ai. Lidhur me zhvillimin e zgjedhjeve, Basha theksoi se duhet dekriminalizimi i tyre si edhe vetingu në politikë, duke i cilësuar këto si kushte të panegocieshme. “De- kriminalizimi i zgjedhjeve është kusht i panegociueshëm, siç është edhe vetingu i politikanëve, siç është kalimi i një ligji antimafia për të konfiskuar pasurinë e çdokujt, oligark apo qeveritar, që është përfshirë në PPP- të, koncesionet dhe tenderët korruptivë, për shkak të cilëve nuk ka para për të financuar auditorët dhe laboratorët”, pohoi Basha, duke shtuar se PD- ja dhe opozita do të prijë protestat qytetare përmes një kryengritjeje demokratike popullore. Pas fjalës së kryetarit të PD- së, opozita u largua nga Parlamenti në shenjë proteste, duke mos dëgjuar fjalimin e Kryeministrit Rama, i cili doli në foltore për të replikuar me kreun e PD- së.