Rama, zyrtarisht edhe ministër, Braho abstenon shkarkimin e Bushatit
Shkarkimi i Ditmir Bushatit dhe emërimi i Kryeministrit Rama, edhe në postin e ministrit të Jashtëm, nuk tregoi qëndrimin unanim të Grupit Parlamentar të Partisë Socialiste. Në hapje të votimit, kryetari i Kuvendit, Gramoz Ruçi, hodhi në votim dekretin për shkarkimin e Ditmir Bushatit, i cili mori 77 vota pro dhe 1 abstenim. Vota abstenim erdhi nga deputeti Spartak Braho, i cili, para se të merrte mandatin, ishte në detyrën e këshilltarit të Ramës. Ndërsa dekreti për votimin e Ramës edhe ministër të Jashtëm u miratua me 78 vota pro, duke marrë të gjitha votat e deputetëve që ishin të pranishëm. Seanca e djeshme plenare shënoi edhe rifillimin e punës së deputetëve të Kuvendit të Shqipërisë. Pas një pushimi njëmujor, Kuvendi hapi dyert, duke vijuar me miratimin e disa akteve dhe ndryshimeve në përbërjen e komisioneve parlamentare. Kjo pasi në drejtimin e komisioneve parlamentare ishin krijuar disa vakanca pas emërimit të disa deputetëve në postet e ministrave. Konkretisht, seanca miratoi me 78 vota pro emërimin e Niko Peleshit në postin e kryetarit të Komisionit për Veprim- tarinë Prodhuese, Tregtinë dhe Mjedisin në vend të Eduard Shalsit. Po me 78 vota pro u miratua emërimi i Arben Ahmetaj në postin e kryetarit të Komisionit për Ekonominë dhe Financat në vend të Erion Braçes, i cili u emërua në postin e zëvendëskryeministrit. Ndërsa Senida Mesi, ish- zëvendëskryeministrja u emërua në postin e zëvendëskryetares së Komisionit për Integrimin Europian, duke zëvendësuar Bledi Çuçin, i cili u bë ministër i Bujqësisë. Seanca miratoi me 78 vota pro edhe zgjatjen e punës së Komisionit të Posaçëm për Re- formën Zgjedhore për 30 ditë, ku synohet që përgjatë këtij muaji maxhoranca dhe opozita të gjejnë konsensusin për miratimin e paketës së ndryshimeve në Kodin Zgjedhor. Ministret e tjera të shkarkuara, Lindita Nikolla dhe Mirela Kumbaro, u votuan si anëtare të Komisionit për Arsimin dhe Mjetet e Informimi Publik. Postin e zëvendëskryetares së Komisionit për Çështjet Sociale dhe Shëndetësinë e mori deputetja Klodiana Spahiu, duke zënë vendin e Elisa Spiropalit, e cila u emërua ministre e Shtetit për Parlamentin.