Ekipi i ri, Bardhi: Procesi transparent, në Kryesi ka kritikë të Bashës
Sekretari i përgjithshëm i PDsë, Gazment Bardhi, është i bindur se Partia Demokratike nga zgjedhjet e brendshme doli më e fortë dhe se Lulzim Basha gëzon mbështetjen e të gjitha strukturave të PD- së. Në një intervistë për "A Show" në "News 24", të gazetarit Adi Krasta, Bardhi ka sqaruar se sfida më e madhe që ka sot Partia Demokratike është rikthimi i besimit të shqiptarëve. "Nëse analizon listën e anëtarëve të Kryesisë, të cilët janë zgjedhur me votë nga anëtarët e Këshillit Kombëtar, do të shikosh që aty brenda ka individë të votuar që kanë qenë kritikë ndaj Bashës dhe me deklarata që shpeshherë tejkalonin normalitetin brenda shfaqjes së mendimit të lirë në një parti politike. Kanë mbetur zëra që edhe në realitet janë mbështetës të Bashës, që është kryetar i PD- së, por ky është procesi transparent dhe demokratik që ndodh në PD. Lulzim Basha është kryetar i PD- së, gëzon mbështetjen e të gjitha strukturave të PD- së dhe pa diskutim, gëzon edhe mbështetjen e çdo demokrati që beson se PD- ja është alternativa e vetme që e çon vendin përpara drejt integrimit në BE dhe demokra- tizimit të mëtejshëm të qeverisjes në vend. Kjo është sfida jonë kryesore: të kthejmë besimin te qytetarët. Nuk do të duhet në asnjë moment që të presim qytetarët që të vijnë te ne, do të duhet që ne të shkojmë te qytetarët, të dëgjojmë hallet dhe shqetësimet e tyre, të hyjmë brenda shqetësimeve të tyre, sepse nuk do të mund të analizojmë dhe nuk do të arrijmë kurrë shqetësimet e njerëzve, të një njeriu që nuk ka bukë në shtëpi nëse në shtëpinë tonë kemi bukë për të ngrënë. Pra, duhet të shkojmë atje ku ky fenomen i dhimbshëm ndodh, për ta përjetuar vetë këtë fenomen. Për të dëgjuar ëndrrat dhe shpresat që kanë fëmijët e tyre dhe qytetarët shqiptarë në tërësi dhe për t'iu ofruar atyre zgjidhje. Kjo është sfida që kemi ne sot. Ne nuk kemi sfidë përballjen me numra apo shifra me Edi Ramën dhe PS- në. Sfida jonë kryesore sot është të bëhemi njësh me qytetarët shqiptarë", tha Bardhi. Sekretari i ri i përgjithshëm i PD- së deklaroi se demokratët nuk do të pranojnë të vijnë në pushtet në asnjë lloj forme tjetër veç votës. Bardhi sqaroi se opozita dhe aleatët e saj do të ndjekin çdo rrugë njëra pas tjetrës për rrëzimin e qeverisë dhe për imponimin e një qeverie tranzitore, që të përgatisë zgjedhjet parlamentare. "PD- ja dhe çdo parti politike në çdo vend demokratik, vjen në pushtet vetëm nëpërmjet votës. Pra, nuk rrëzohet dhe ndryshohen partitë në qeverisje me marrëveshje apo me zgjidhje politike. Është vota e qytetarëve ditën e zgjedhjeve, që përcakton se cila parti politike duhet të jetë në qeveri dhe për këtë nuk kemi asnjë dyshim. Nuk kemi për të pasur kurrë asnjë dyshim, sepse Shqipëria është një vend demokratik dhe që sipas ligjit dhe Kushtetutës, janë zgjedhjet ato që përcaktojnë qeverisjen", deklaroi Bardhi.