Njoftojnë Policinë për shkeljet, Lleshaj i inkurajon: S'jeni "spiunë"
Etiketimet si "spiunë" të qytetarëve që raportojnë në Polici shkelje të ndryshme, kanë ngacmuar ministrin e Brendshëm Sandër Lleshaj, i cili ka vendosur t'i inkurajojë qytetarët që janë kthyer në bashkëpunëtorë të Policisë. Përmes një reagimi në "Twitter", Lleshaj shkruan se bashkëpunimi me Policinë në çdo vend është qytetari dhe ata që etiketohen si "spiunë", bëjnë vetëm detyrën bazë qytetare, që është angazhimi për sigurinë e përbashkët. "Hapësirat e reja të komunikimit me qytetarët po japin rezultate inkurajuese në punën e Policisë. Kriminelë apo shkelës të tjerë të ligjit po vihen përpara përgjegjësisë falë informimit të qytetarëve. Për fat të keq, disa individë apo media të izoluara i etiketojnë si ' spiunë' ata që bëjnë detyrën bazë qytetare: angazhimin për sigurinë e përbashkët. Por ne vazhdojmë bashkë, për ta ndërtuar bashkë me qytetarët, sigurinë dhe të ardhmen. Ka vetëm dy rrugë: Ose qytetarët bëhen bashkë me Policinë për ta mposhtur të keqen kriminale, ose ata qëndrojnë indiferentë apo bashkëpunojnë me të keqen, për të rrënuar të sotmen dhe të ardhmen e tyre. Bashkëpunimi me Policinë është qytetari në çdo vend europian. Stigmatizimi i bashkëpunimit është barbari. Mbështeteni Policinë tuaj!", shprehet ministri Lleshaj. Paraditen e djeshme, Policia e Tiranës njoftoi për arrestimin e një 29vjeçari që drejtonte mjetin me patentë të falsifikuar. Ndërsa theksoi se ai ishte denoncuar nga qytetarët. "Pas një informacioni adresuar Policisë së Shtetit në rrjetet sociale mbi një shtetas që drejtonte mjetin me një patentë të falsifikuar, Policia Rrugore e kryeqytetit bëri ndalimin e shtetasit me iniciale A. S., 29 vjeç, i cili nga verifikimi rezultoi se dispononte një leje drejtimi të falsifikuar, me foton e tij dhe identitet tjetër. Në këto kushte u bë arrestimi i tij në flagrancë", njoftoi Policia.