Vendimi, formular i ri për kreditë e shtëpive
Qeveria ndryshon të gjithë procedurën e aplikimit të kredive për shtëpi. Zbardhet formulari i ri dhe dokumentet që duhet të plotësohen
Pas miratimit të ligjit të ri të strehimit, Qeveria ka gati edhe aktet nënligjore me anë të të cilave detajohen programet që do të aplikohen, kriteret, dokumentacioni si edhe afatet.
Gazeta zbardh sot formularin e aplikimit, si edhe procedurat që do të duhet të ndjekin qytetarët. Procesi është i ndarë në dy faza. "Në fazën e parë, aplikantët shprehin vullnetin e tyre për të përfituar nga programet e strehimit social, sipas ligjit 22/ 2018", thuhet në nenin 4 të projektvendimit. Veç të dhënave bazë, do të kërkohet po ashtu informacion mbi kushtet ekonomike, pra të ardhurat që ka familja, për kushtet sociale referuar kategorive specifike, siç janë jetimët, personat me aftësi të kufizuar, familjet e policëve të rënë në detyrë, emigrantët e rikthyer, prindërit e vetëm që kanë në ngarkim fëmijë etj.. Të dhëna do të kërkohen po ashtu, për kushtet e strehimit në të cilat ndodhet familja në momentin e aplikimit. Në fund të formularit janë renditur edhe programet e strehimit, ku përfshihet banesë sociale me qira, banesë me kosto të ulët, tokë e pajisur me infrastrukturë për të ndërtuar vetë banesë, si edhe përmirësimi i banesës aktuale. Qytetarët bëjnë renditjen e tyre, nga më i preferuar në më pak i preferuar. Me rëndësi janë edhe dy opsionet e parashtruara. Kështu, në mungesë të banesave sociale, ofrohet subvencionimi i qirasë në tregun e lirë dhe në mungesë të banesave me kosto të ulët, ofrohet, sipas mundësive buxhetore, subvencionimi i interesave të kredive ose siç njihen ndryshe, kreditë e buta.
FAZA E DYTË Gjatë fazës së dytë vendoset për trajtimin e aplikantit me një program social. Në këtë fazë, çdo aplikant duhet të dorëzojë dokumentacionin që vërteton deklarimet e bëra në fazën e parë. Një javë pas dorëzimit të dosjes, qytetarët njoftohen nëse kanë mangësi në dokumentacion. Në të kundërt, bëhet regjistrimi i kërkesës. "Njësia e vetëqeverisjes vendore planifikon zbatimin e njërit prej programeve apo instrumenteve të strehimit social. Aplikantët mund ta refuzojnë formën e strehimit dhe të mbeten përsëri në listën e pritjes, vetëm kur nuk u janë plotësuar kushtet e strehimit, sipas normave në fuqi", saktësohet në draft. PROGRAMET E
STREHIMIT Gjithsej do të jenë 6 programe sociale, që do të zbatohen për t'u ardhur në ndihmë të pastrehëve. Krahas programit të banesave sociale me qira dhe shpërndarjes së banesave me kosto të ulët, në skemë janë përfshirë edhe disa programe të tjera, siç është ai për përmirësimin e kushteve të banesave ekzistuese, programi për zhvillimin e zonës me qëllim strehimi, krijimi i strehëve të përkohshme, si edhe programi për ndërtimin e banesave të specializuara. Sikundër ka ndodhur, nga ana e bashkive do të vijojnë të ndahen banesa sociale me qira. Ligji përcakton që qiraja nuk duhet të jetë më e lartë se 30 për qind e të ardhurave që familja gjeneron në muaj, ndërsa për familjet që janë pjesë e skemës së ndihmës ekonomike, do të subvencionohen në masën 100 për qind.