Rama: Basha e shkatërroi PD, na qan hallin si Shqipëria- Amerikës
Paralajmërimi: Gati paditë për Presidentin në Gjykatë Kushtetuese
Pas akuzave të kryetarit të Partisë Demokratike, Lulzim Basha, se kabineti i ri qeveritar kishte uzurpuar Partinë Socialiste, reagoi Kryeministri Rama.
Nga foltorja e Kuvendit, Rama iu përgjigj me të njëjtën monedhë kryetarit të PD- së, duke theksuar se vetë Basha ka shkatërruar Partinë Demokratike. “Këta kanë vetëm vjedhjen në gojë. Ky thotë se këta njerëz ( ministrat e rinj), i sollën oligarkët këtu, ndërsa dihet botërisht se kush ia bën edhe listat e deputetëve apo edhe kryesinë e Partisë Demokratike, dje. Vijnë e flasin këta dhe qajnë hallin e Partisë Socialiste. Po Partia Demokratike ku është? Tamam si atëherë kur Shqipëria i qante hallin Amerikës. E ka bërë PD- në kashtë dhe vjen këtu dhe i qan hallin PS- së. Edhe Taulanti personalisht po t’i kishte thënë me letër, merre dhe shkatërroje PD- në, nuk e bënte dot siç e bëri Luli. Personalisht, Taulant Balla, njeriu i të gjitha të zezave, nuk ia bënte dot atë të zezë siç ia bëri Luli Partisë Demokratike”, deklaroi Rama. Krahas kësaj, Kryeministri iu përgjigj edhe akuzave të bëra nga opozita në Parlament për anulimin e koncesionit për ndërtimin e rrugës Thumanë- Kashar. “Dëgjojini, dëgjojini! Dëgjojini se janë për të qeshur ( ata që s’u besojnë) dhe për të qarë ( ata që u besojnë)! Kur do bëhej rruga Thumanë- Kashar ishte një grabitje qindra milionë, tani që me të njëjtën formulë do investohet për universitetet, s’ka lekë. Çfarë lolosh laj- thaj”, deklaroi Kryeministri. Qëndrimet e opozitës në sallën e Kuvendit, Rama i cilësoi si shpifje duke marrë si shembull gjyqin e zhvilluar me Edi Palokën. “Ne si këta nuk jemi, por kur vijmë këtu, në këtë kazan, që është kazani më i madh i Shqipërisë, Parlamenti i transformuar në kazan nga këta, ne dukemi si këta. Sot është dënuar për shpifje nga Gjykata dhe shiko se çfarë logjike, njësoj siç e kam parë me sytë e mi ‘ mister Th’ ( Edi Paloka), që kur doli para Gjykatës, si pulë, thoshte nuk kemi gjë me këtë, por ne kështu na tha partia. Ku i keni provat? Prova është partia, se ne i besojmë partisë e si do mendojmë, që partia nuk thotë të vërtetën? Ja këto thoshte ‘ mister Th’- ja ( Edi Paloka) aty”, deklaroi Rama. KONFLIKTI
Pas mbarimit të seancës plenare, Rama dha një prononcim për mediat, duke ashpërsuar tonet me Presidentin Ilir Meta. Pak minuta pasi u votua nga Kuvendi edhe si ministër i Jashtëm, Rama tha se sapo të ngrihet Gjykata Kushtuese do të depozitojë padi për Presidentin Metën. “Ne kemi ngritur një numër padish për një sërë shkeljesh nga ana e Presidentit dhe për këtë rast ( I referohet mosdekretimit të Cakajt). Duroni se do të bëj betimin, pastaj do të vazhdoj me të tjerat”, deklaroi Kryeministri. Ai shtoi më tej se marrja e postit të minis- trit të Jashtëm u bë për shkak të mungesës së Gjykatës Kushtetuese, e cila, sipas tij, do ta kishte ndaluar Presidentin Meta për të mosdekretuar Gent Cakajn për ministër të Jashtëm. “Askush nuk e ka bërë këtë më parë. Në kushtet kur nuk ka një Gjykatë Kushtetuese ende dhe në pritje të formimit të Gjykatës së re Kushtetuese për të drejtuar në rrugë institucionale shkeljen e Kushtetutës nga ana e Presidentit të Republikës, u detyrova të marr këtë vendim, duke besuar nga njëra anë se projekti i qeverisë së re nuk duhej cenuar dhe as se nuk duhej të zgjidhej një ministër i Jashtëm për një periudhë relativisht të shkurtër”, tha Rama.