Vendimi i Gjykatës, Balla: Basha dhe PD të heqin dorë nga shpifjet
Kreu i grupit të deputetëve të PS pas seancës
Kryetari i Grupit Parlamentar Socialist, Taulant Balla, pas vendimit të Gjykatës, i kërkoi opozitës që të heqë dorë nga shpifjet. Balla tha se "në aspektin civil e njoftoj Lulzim Bashën sot, se do të përballet edhe me një padi tjetër, shuma e së cilës do garantojë ndërtimin e një kopshti të mirëfilltë". "Ne politikanët duhet të kuptojmë se, në radhë të parë, jemi qytetarë dhe duhet të trajtohemi njëlloj nga Gjykata. Të drejtën tonë për deklarime publike nuk duhet ta shfrytëzojmë aspak për shpifje të ulëta. Ky vendim gjykate sot është një vendim historik, për të cilin ne politikanët duhet të reflektojmë gjatë. I pari që duhet të reflektojë është Lulzim Basha, i cili sot është shpallur fajtor penalisht dhe i detyrohet shtetit shqiptar të shlyejë dënimin e merituar që sot Gjykata dha. E dyta, dua të them që do t'i kërkoja Lulzim Bashës dhe Partisë Demokratike që të heqin dorë nga kjo politikë bajate e bazuar tërësisht në shpifje", tha Balla pas vendimit të dhënë nga Gjykata e Tiranës. Ai i kërkoi opozitës që të jetë më e përgjegjshme ndaj institucioneve. "Ky vendim gjykate sot, le të jetë një moment që edhe Partia Demokratike, meqenëse jemi edhe në fillim të sesionit të ri parlamentar, të reflektojë në marrëdhënien ndërinstitucionale që ka qoftë me maxhorancën, qoftë me Kuvendin e Shqipërisë apo institucionet e tjera të këtij vendi. Le të jetë ky fillim sesioni, ku opozita të ketë tërësisht një qasje tjetër ndaj Kuvendit të Shqipërisë duke ushtruar përgjegjësinë e vet", tha Balla.