Muhamet Rrumbullakun emërohet në krye të SHÇBA
Largohet nga detyra Anila Trimi, ishte emëruar nga Xhafaj
Drejtuesi i parë, Muhamet Rrumbullaku, që në vitin 2013 u transferua në Qendrën e Formimit Policor, tashmë do të jetë në krye të Shërbimit për Çështjet e Brendshme dhe Ankesat.
Me urdhër të ministrit të Brendshëm, Sandër Lleshaj, është shkarkuar nga kjo detyrë Anila Trimi, e cila u emërua në kohën e ish- ministrit Fatmir Xhafaj dhe në vend të saj është emëruar Rrumbullaku. Zv. ministri i Brendshëm Besfort Lamallari, gjatë një takimi paraditen e djeshme me drejtuesit qendrorë të SHÇBAsë, bëri të njohur urdhrin e ministrit të Brendshëm Sandër Lleshaj, për ndryshime në nivel drejtues në këtë strukturë. Kështu, Muhamet Rrumbullaku, me një karrierë të gjatë në strukturat e Policisë së Shtetit, emërohet drejtor i Shërbimit për Çështjet e Brendshme dhe Ankesat, në Ministrinë e Brendshme. Prej disa vitesh ai vijonte detyrën e tij në Akademinë e Sigurisë që kur i transferua në vitin 2013, kur u shkarkua nga detyra e zv. drejtorit të Përgjithshëm për Rendin dhe Sigurinë Publike. E më herët kishte drejtuar Policinë e Tiranës.
KARRIERA
Muhamet Rrumbullaku ka pasur një karrierë të gjatë dhe përherë në ngjitje në strukturat e Policisë së Shtetit, duke u konsideruar si një prej drejtuesve më të suksesshëm. Ai ka drejtuar për disa kohë Komisariatin Nr. 2 të Policisë së Tiranës, në vitin 2004. Më pas, karriera e tij pësoi ngritje, me emërimin e tij si shef i Krimeve në Drejtorinë e Tiranës në vitin 2005. Pas një shkëputjeje që zgjati vetëm pak muaj, Rrumbullakut iu besua drejtimi i Policisë së Durrësit. Një detyrë problematike, të cilën ai e mori më 30 tetor 2005, për të ndërtuar një bashkëpunim model me Prokurorinë e qytetit bregdetar dhe Prokurorinë e Krimeve të Rënda, deri pak javë para se të emërohej në krye të Policisë së Tiranës. Nuk dihet sa i angazhuar ka qenë personalisht Muhamet Rrumbullaku në dosjet e veçanta, por zyrtarët e Policisë nuk mohojnë kontributin e tij në goditjet e muajve të fundit të vitit 2005 ndaj grupeve dhe individëve të inkriminuar, që vepronin më parë në qytetin e Durrësit. Karriera e larmishme, por më shumë se gjithçka puna e realizuar në Durrës, në goditjen e krimit sollën prezantimin e Rrumbullakut para punonjësve të Drejtorisë së Policisë Tiranë në qershor të vitit 2007. Një detyrë, të cilën ai e filloi me njohjen e hollësishme të situatës, çështjeve në hetim, dosjeve të pazbardhura, përpjekjes për të qenë transparent, por edhe hermetik, kur bëhet fjalë për sekretin hetimor.