Meta nuk dekreton Gjinushin, Qeveria rrëzon projektligjin për Akademinë e Shkencave
"Statusi i anëtarit të rregullt të Akademisë s'mund të ushtrohet paralelisht me funksionet drejtuese të larta në parti politike"
Presidenti i Republikës, Ilir Meta, nuk dekretoi Skënder Gjinushin në krye të Akademisë së Shkencave. Përmes një dekreti të posaçëm, kreu i shtetit jep dhe arsyet që e çuan në këtë vendim.
"Pasi shqyrtova kërkesën dhe praktikën e përcjellë nga sekretari shkencor i Akademisë së Shkencave me shkresë nr. 89/ 41 prot., datë 24.05.2019, nëpërmjet së cilës kërkohet dekretimi për emërimin e zotit Skënder Gjinushi si kryetar i Akademisë së Shkencave të Republikës së Shqipërisë, dekretova ' Refuzimin e emërimit të akademikut Skënder Gjinushi si kryetar i Akademisë së Shkencave të Republikës së Shqipërisë'", thuhet në dekretin e Metës. Në arsyet e numëruara, kreu i shtetit thekson që nga zgjedhja me një kandidaturë të vetme, te mbajtja e postit të kreut të Partisë Socialdemokrate e Shqipërisë, pa ndërprerje, deri ditën e realizimit të procesit zgjedhor për kryetar të Akademisë së Shkencave. "Statusi i anëtarit të rregullt të Akademisë së Shkencave nuk mund të ushtrohet paralelisht me kryerjen e funksioneve drejtuese të larta në parti politike.
Në rastin konkret, kjo kërkesë e ligjit nr. 9655/ 2006 "Për Akademinë e Shkencave në Republikën e Shqipërisë" të ndryshuar, rezulton të jetë një fakt i pranuar edhe nga kandidati Skënder Gjinushi, pasi pikërisht dorëheqja e tij nga funksioni si kryetar i Partisë Socialdemokrate, është bërë në datën 15 maj 2019 për shkakun se ai po konkurronte për një funksion drejtues të Akademisë së Shkencave, siç është Kryetari i Akademisë së Shkencave. Kjo dorëheqje nuk e justifikon faktin që shprehja e interesit për kandidim, e paraqitur në cilësinë e anëtarit të rregullt të Akademisë më 10.05.2019, rezulton të jetë ushtruar në kushte të papajtueshmërisë dhe ndalimit ligjor. Për më tepër, dorëheqja nga funksioni i Kryetarit të Partisë Socialdemokrate e paraqitur nga zoti Skënder Gjinushi më 15.05.2019, nuk është formalizuar me një vendimmarrje ligjore përpara kohës së zhvillimit të zgjedhjeve për Kryetar të Akademisë së Shkencave, në datën 24.05.2019", thuhet në argumentet e Presidentit. Gjithashtu, në argumentet e kreut të shtetit për mosdekretimin e Gjinushit, jepet dhe fakti që ai nuk ka pasur kandidatë alternativë për kreun e Akademisë. "Për zhvillimin e procesit zgjedhor është mbajtur procesverbali nr. 89/ 38 prot., datë 24.05.2019, për dokumentimin e procesit të votimit. Ky procesverbal është mbajtur nga komisioni përkatës i ngritur për këtë qëllim. Nga ky dokument rezulton se për postin drejtues të Kryetarit të Akademisë së Shkencave është paraqitur kandidatura e vetme nga akademiku Skënder Gjinushi. Nga këto ka rezultuar se për zgjedhjen e akademikut Skënder Gjinushi për Kryetar të Akademisë së Shkencave gjenden 35 ( tridhjetepesë) vota që kanë votuar ' pro' zgjedhjes, si dhe 6 ( gjashtë) vota që kanë votuar ' kundër' zgjedhjes së tij në këtë pozicion", thuhet në argumentet e Presidentit. Më tej, kreu i shtetit argumenton kompetencën e tij kushtetuese për të rrëzuar zgjedhjen e re në krye të Akademisë. "Ushtrimi i kompetencës kushtetuese të Presidentit të Republikës, për emërimin e Kryetarit të Akademisë së Shkencave, parashikuar në nenin 92/ g të Kushtetutës, kërkon domosdoshmërisht shprehjen e vullnetit nga Presidenti i Republikës, vullnet ky, i cili formohet vetëm pas verifikimit dhe vlerësimit jo vetëm të procedurës së ndjekur nga organet respektive që kanë realizuar procesin zgjedhor, por dhe verifikimin e vlerësimin e çështjes për të vënë në dukje faktin nëse i gjithë ky proces është i mbështetur ose jo në ligj dhe në prova. Kushtetutëbërësi i ka dhënë Presidentit të Republikës kompetenca për emërimin e kryetarit të Akademisë së Shkencave, pikërisht për të garantuar zbatimin e paanshëm të parimit kushtetues të ndarjes e balancimit të pushteteve, me qëllim shmangien e çdo lloj ndikimi politik në këtë institucion, në mënyrë që të garantohet jo vetëm autonomia dhe liria akademike, por dhe respektimi i ligjit sipas frymës së Kushtetutës", thuhet në argumentet e Presidentit.