KQZ “teatër” me rinumërimin e votave, fshihen listat e zgjedhësve
Zguri: “E gjitha farsë. O Zot, si nuk tha asnjë nga ankimuesit që të shihen listat e votuesve”. Biba: “Donin ta kthenin në ‘ Big Brother’”
Zgjedhjet për Bashkinë e Lezhës janë të vlefshme dhe pretendimet e ngritura për parregullsi nuk janë të bazuara.
Ky ishte vendimi që mori Komisioni Qendror i Zgjedhjeve pas rinumërimit të 11 kutive në këtë bashki, pas pretendimeve të ngritura nga Partia Konservatore dhe kandidati për këtë bashki, Eduard Ndocaj, se në kuti kishte më shumë vota sesa votues. Testi i parë për të bërë transparencë për zgjedhjet e 30 qershorit, pas shumë denoncimesh dhe pretendimeve nga opozita, u kthye në një teatër. Procesi i rinumërimit të kutive u bë i gjithi para mediave, ndërkohë që në fund të tij, kreu i KQZ- së, Klement Zguri, e vlerësoi të gjithën si një farsë. Nga rinumërimi rezultoi se 9 kuti ishin në përputhje të plotë me procesverbalet e firmosura nga komisionerët në qendrat e votimit, ndërkohë që vetëm në 2 prej kutive, 4 vota të ishdeputetit Eduart Ndocaj kishin shkuar për Partinë Socialiste dhe Bindjen Demokratike. KQZ, me votën e anëtarëve socialistë, rrëzoi edhe ankimimin e dytë të Partisë Konservatore, e cila kishte ngritur dyshime për numër më të madh votash në kuti sesa votues kishin ushtruar të drejtën e tyre në zgjedhjet e 30 qershorit.
DEBATI Për nënkryetarin socialist të KQZ- së, Denar Biba, rinumërimi i votave në 11 kutitë e Lezhës rrëzoi çdo pretendim që ishte ngritur në tërësi për zgjedhjet e 30 qershorit. Sipas Bibës, opozita kërkoi ta kthente të gjithë procesin në një “Big Brother” të madh, me qëllim banalizimin e të gjithë zgjedhjeve në tërësi. “Donin patjetër të shikonin një ‘ Big Brother’ elektoral, ja e morën. Gjithçka doli korrekte dhe në bazë të ligjit, por të paktën kursyem ‘ Big Brother’- in e madh për të mos i banalizuar zgjedhjet, që në thelb ngelen një ushtrim i lirë i qytetarëve në funksion të ligjit”, deklaroi Biba. Por pavarësisht vetëkënaqësisë së socialistëve për rezultatet e rinumërimit, kreu i KQZ- së, Klement Zguri, të gjithë procesin e vlerësoi si një farsë për aq kohë sa asnjë nga subjektet politike nuk kërkoi lista të zgjedhësve. “Në përfundim të këtij procesi, vë re, me dhimbje, se subjektet zgjedhore të drejtën e tyre ligjore për të ankimuar e kanë kthyer në një farsë. Nëse ti si subjekt ke një pretendim se qenkan vota më shumë se ç’ka zgjedhës, realisht po minimumi është lista e zgjedhësve, lista e votuesve. Jo vetëm këta, por edhe ankimet e mëparshme. O zot, po si një njeri, një ankimues, nuk flet dhe nuk artikulon dot fjalën ‘ të shikohen listat e votuesve’. Pretendimin e kanë se ka vota më shumë nga zgjedhësit dhe listat nuk i përmend njeri. Dhe unë kthehem shumë vite më parë, jo te ‘ Big Brother’- i, por te Migjeni. Listat e zgjedhësve qenkan ‘ mollë e ndalume’ në këtë proces zgjedhor”, theksoi Zguri. Por kundër kërkesës së Zgurit për të bërë transparencë në lidhje me listat e zgjedhësve ishte anëtari tjetër i PS- së në KQZ, Bledar Skënderi. Sipas tij, listat e zgjedhësve përmbajnë të dhëna personale të qytetarëve dhe është në shkelje kushtetuese publikimi i tyre. “Lista e zgjedhësve është një dokument që ngel në Arkivin e Shtetit. Nëse një subjekt, për arsye kërkimore, shkencore dëshiron të bëjë një studim të thelluar pas zgjedhjeve, pasi ne t’i çojmë në Arkivin e Shtetit, ato materiale mund të shkojë edhe t’i marrë. Të bëjë edhe një kërkesë për Ministrinë e Brendshme dhe të bëjë verifikimet. Listat e zgjedhësve janë të dhëna sensitive për qytetarët. Partia Demokratike do të zbulojë vullnetin e qytetarëve, ndërkohë që unë mendoj se është një shkelje kushtetuese”, sqaroi Skënderi.