Arrestohet në kampin e azilantëve rusi në kërkim për terrorizëm
Luftëtari i ISIS hyri ilegalisht nga Greqia një vit më parë. Qëndroi 1 vit në kamp, u zbulua nga ADN dhe gjurmët e gishtave
Një shtetas rus, luftëtar i Shtetit Islamik, i shpallur në kërkim për terrorizëm, u arrestua dje nga oficerët e Drejtorisë së Antiterrorit të Policisë së Shtetit.
I arrestuari është 34- vjeçari Rasul Mislaev, lindur dhe banues në Norilsk të Rusisë. Ndërsa ndaj tij ishte lëshuar një urdhërarrest që prej vitit 2015 nga Gjykata e Nadterechni, Republika Çeçene, Rusi, për veprën penale "Pjesëmarrja në organizatë terroriste", parashikuar nga Kodi Penal rus. Policia e Shtetit tha dje se i kërkuari për terrorizëm u prangos me qëllim ekstradimi drejt Rusisë, falë bashkëpunimit me agjencitë ligjzbatuese partnere dhe ato të inteligjencës. "Drejtoria e Antiterrorit në Policinë e Shtetit, pas një pune disamujore, duke koordinuar veprimet me shërbimet ligjzbatuese partnere dhe ato të inteligjencës, lokalizoi, identifikoi dhe arrestoi me qëllim ekstradimin drejt Rusisë, shtetasin Rasul Mislaev, 34 vjeç, lindur dhe banues në Norilsk, Rusi. Ky shtetas ka ardhur si emigrant i paligjshëm në Shqipëri dhe ishte shpallur në kërkim nga Interpol Moska, pasi Gjykata e Rrethit Gjyqësor në Nadterechni, Republika Çeçene, Rusi, me vendim penal të datës 08.04.2015, ka lëshuar urdhërarrestin për këtë shtetas, për veprën penale ' Pjesëmarrja në organizatë terroriste', parashikuar nga Kodi Penal rus", tha dje zyrtarisht Policia.
I KERKUARI Sipas burimeve zyrtare të Policisë së Shtetit, Rasul Mislaev në qershor të vitit 2013 ishte larguar nga Rusia për në Siri, ku i është bashkuar një grupimi ilegal të armatosur, të ashtuquajturit "Shteti Islamik" ( ISIS), duke qenë pjesëmarrës aktiv në luftime kundër forcave qeveritare në Siri. Një vit më parë, ai ka hyrë në territorin e Shqipërisë si emigrant i paligjshëm që vinte nga Greqia dhe pasi janë kryer procedurat e intervistimit, është strehuar në Qendrën e Pritjes së Azilkërkuesve që ndodhet në autostradën Tiranë- Durrës. Gjatë kësaj kohe nuk ka pranuar të komunikojë me asnjë person tjetër, duke qëndruar i veçuar. Ndërsa mësohet se gjatë intervistimit, ai kishte dhënë identitet të rremë. Për të zbuluar identitetin, qëllimet, por edhe të shkuarën e tij, Drejtoria e Antiterrorit ka nisur hetimet që kanë zgjatur disa muaj. Atij i është marrë ADN- ja dhe gjurmët e gishtave, që janë dërguar për krahasim në Interpol dhe Europol. Disa ditë më parë, Interpol Moska ka kthyer përgjigje zyrtare pas përputhjes së ADN- së dhe gjurmëve të gishtave me 34vjeçarin që ata e kishin në kërkim ndërkombëtar. Pas kësaj përgjigjeje është organizuar puna dhe shtetasi Rasul Mislaev është arrestuar në ambientet e Qendrës së Azilkërkuesve me qëllim ekstradimi. Dosja hetimore në ngarkim të tij i ka kaluar Prokurorisë së Krimeve të Rënda për veprën penale "Pjesëmarrja në veprime luftarake në një shtet të huaj", parashikuar nga neni 265/ a i Kodit Penal të Republikës së Shqipërisë.