‘ Takim Balla- Bardhi për krizën’, Spaho: Spekulime nga zyra e Ramës
Nënkryetari i PD- së, Edmond Spaho, ka përgënjeshtruar zhvillimin e një takimi mes sekretarëve të përgjithshëm të PD dhe PS, Gazment Bardhi dhe Taulant Balla. Spaho sqaroi në një intervistë për “NewS 24” se lajmi për një takim mes dy eksponentëve të lartë të PS- së e PD- së është një spekulim i pastër i dalë nga zyrat e Edi Ramës. “Ky është një spekulim i pastër që vjen nga rrethet e Kryeministrit Edi Rama. Për të dalë nga kjo situatë hedhin shashka të tilla, por qëllim ynë është i qartë: nuk kemi hyrë në këtë betejë për pazare dhe interesa të ngushta, por kemi hyrë për mbajtjen e zgjedhjeve të lira dhe të ndershme. Kushti i parë është që të dënohen ata që kanë futur dorën në zgjedhje. Sot ka fakte se sa herë ka zgjedhje, Rama fut duart në procesin zgjedhor. Një dialog e bëmë në 2017, e kishim kërkesën që me Ramën nuk shkojmë në zgjedhje, por shkuam dhe rezultati tregoi se ai manipuloi zgjedhjet. Si kryetar i PS- së, por jo si Kryeministër, është e drejtë e tij të jetë në tryezën e partive politike. Pazar me Edi Ramën nuk ka pasur dhe nuk do të ketë. Rama me kokëfortësi kërkon të marrë të gjitha pushtetet. Ai po ecën në këtë rrugë. Edhe shtypi ndërkombëtar mbështet opozitën dhe ushtron presion për ndryshime të shpejta dhe substanciale në tërësi”, tha Spaho. I pyetur për raportin e publikuar nga DASH mbi klimën e biznesit në Shqipëri, ish- kreu i Grupit Parlamentar të PDsë tha se ky raport tregon një të vërtetë të hidhur dhe fakton se Shqipëria është vendi më i korruptuar në gadishullin ballkanik. “Raporti është nga më negativët që është publikuar për klimën e biznesit në Shqipëri. Raporti tregon se Shqipëria është vendi më i korruptuar në Gadishullin e Ballkanit. Raporti tregon se korrupsioni është faktori numër një i problemeve dhe shumë kompani amerikane janë larguar”, theksoi Spaho. Sipas demokratëve, zgjidhje për krizën politike në vend do të ishte vetëm ndëshkimi i politikanëve të kapur në përgjime për vjedhjen e votave. Në protestën e 8 korrikut, Basha deklaroi se kriza mund të zgjidhet vetëm përmes vullnetit të politikanëve.