Qeveria kritika pr/ligjin “Gjinushi” për Akademinë
Këshilli i Ministrave ka gjetur shumë parregullsi në projektligjin e ri për Akademinë e Shkencave propozuar nga grupi i punës si në përmbajtje, ashtu dhe në aspektin buxhetor. Në materialin dorëzuar Kuvendit të Shqipërisë, mbi të cilin do të bëhet dhe diskutimi në komisionet parlamentare, në krye të kritikave është mungesa e llogaritjes së kostos financiare që duhet të shoqëronte projektligjin. "Ndryshimi i statusit të Akademisë nga institucion varësie, sipas ligjit nr. 90/ 2012 në institucion të pavarur, ku trajtimi i personelit do të bëhet sipas ligjit nr. 9584, datë 17.07.2006, ' Për pagat, shpërblimet dhe strukturat e institucioneve të pavarura kushtetuese dhe të institucioneve të tjera të pavarura të krijuar me ligj', vlerësohet se do të shoqërohet me një kosto shtesë financiare, e cila duhet të reflektohet në relacionin shoqërues të projektligjit. Krahas kësaj kostoje, në relacion duhet të paraqitet dhe kostoja shtesë që rezulton nga riorganizimi tërësor i Akademisë, shtimi i funksioneve, krijimi i seksioneve të reja, i komisioneve të posaçme etj.. Gjithashtu, referuar faktit se institucionet e pavarura kushtetuese janë të përcaktuara në mënyrë nominative në ligjin nr. 9584, nevojitet të ndërmerret paralelisht dhe iniciativa për rishikimin e këtij ligji, për të mundësuar zbatimin e këtij projektligji. Sugjerojmë që neni 23 i projektligjit duhet të riformulohet, duke përcaktuar që Akademia do të financohet nga buxheti i shtetit e burime të tjera të ligjshme. Ndërkohë, nëse Akademia parashikon të gjenerojë të ardhura, vlerësojmë se trajtimi i të ardhurave duhet të përcaktohet në një nen më vete, në të cilin të përcaktohen llojet e të ardhurave e parashikimi i përdorimit të tyre. këto propozime duhet të jenë të mirargumentuara në relacionin shoqërues të projektligjit", thuhet në materialin e Kryeministrisë. Por projektligji ka probleme që lidhen dhe me përmbajtjen, e sidomos me kompetencat që Akademia tejkalon sa i takon ligjit për arsimin e lartë. Këshilli i Ministrave rrëzon nenin, i cili kërkonte që Akademia e Shkencave të bënte analizën e titujve shkencorë, sidomos të doktorëve të shkencave. "Në pikën 15 të nenit 5 të projektligjit parashikohet se Akademia e Shkencave ka të drejtën e monitorimit të procesit kërkimor, që realizohet në rrjetin e institucioneve publike dhe jopublike dhe të botojë rezultatet e këtij monitorimi. Kjo kompetencë bie në kundërshtim me parimin kushtetues të autonomisë së IAL- ve, parashikuar në pikën 7, të nenit 57 të Kushtetutës dhe të garantuar me ligjin nr. 89/ 2015, ' Për Arsimin e Lartë dhe kërkimin shkencor në institucionet e arsimit të lartë në Republikën e Shqipërisë', ku në pikën 1 të nenit 3 të tij parashikohet se institucionet e arsimit të lartë gëzojnë liri akademike, autonomi financiare, organizative dhe të përzgjedhjes së personelit, në përputhje me legjislacionin në fuqi. Për pasojë, sugjerojmë që kjo pikë nuk mund të qëndrojë në projektligj", thuhet në materialin e Këshillit të Ministrave.