LEJA NGA BURGU
Në njoftimin e saj, Policia bën të ditur se shtetasi Artan Koçeku, i cili ka përfituar leje shpërblimi nga burgu i Peqinit ku vuante dënimin për ngjarjen e ndodhur në vitin 2013 për veprën penale "Vjedhja me armë", nuk u paraqit në vendin e vuajtjes së dënimit në ditën e caktuar. Gjatë kësaj kohe, më datë 17 dhjetor 2017, ky person ka vrarë me armë zjarri shtetasin Angjelin Shkambi, 35 vjeç, banues në Pulaj, Velipojë, Shkodër. I njëjti person në vitin 2018 është përfshirë në një konflikt me armë dhe gjatë ndjekjes nga Policia ka braktisur mjetin në fshatin Shtoj i Ri dhe ka mundur të largohet.
Policia e Shkodrës arrestoi dje shtetasin e shumëkërkuar Artan Koçeku, i dyshuar si autor i vrasjes së Angjelin Shkambit, ngjarje e ndodhur në Shkodër në fund të vitit 2017.
Në njoftimin zyrtar, Policia e Shkodrës deklaroi se ka finalizuar me sukses operacionin e koduar "Iron Hand", duke kapur dhe ndaluar një person me rrezikshmëri të lartë shoqërore, i shpallur në kërkim për vrasje, i cili qarkullonte me armë zjarri me fishek në fole, autor i ngjarjes së ndodhur më datë 17 dhjetor 2017, ku ka mbetur i vrarë shtetasi Angjelin Shkambi. Në vijim të punës për kapjen e personave në kërkim, falë informacioneve të marra në rrugë operative u arrit arrestimi i Artan Koçekut, 29 vjeç, banues në fshatin Pog. Sipas Policisë, ky person me rrezikshmëri të lartë shoqërore, në momentin e kapjes nga Forca e Posaçme "Shqiponja", ka tentuar të largohet me vrap, por është neutralizuar dhe shoqëruar në ambientet e Drejtorisë Vendore të Policisë Shkodër. Gjykata kishte vendosur ndaj tij masën e sigurisë "Arrest në burg". Gjatë kontrollit në automjetin me të cilin udhëtonte, Policia gjeti dhe sekuestroi në cilësinë e provës materiale një pistoletë me fishek në fole dhe një krehër me fishekë, që i përkiste një arme tjetër pistolete. Gjithashtu, në automjet së bashku me këtë person ka qenë edhe shtetasi Rr. D., 24 vjeç, banues në Tiranë, i cili u arrestua në flagrancë për veprën penale "Përkrahja e autorit të krimit". Vrasja e 35- vjeçarit Angjelin Shkambi ndodhi në varrezat e Stom- Golemit në Shkodër, rreth orës 11: 00 të 17 dhjetorit 2017. Sipas Policisë Vendore të Shkodrës, ngjarja dyshohet të ketë ndodhur si pasojë e një konflikti për shkak të një borxhi prej rreth 30 mijë eurosh, që autori i dyshuar Artan Koçeku i ka pasur viktimës Angjelin Shkambi. Autori ka pasur një komunikim me telefon me viktimën përpara se të ndodhte ngjarja dhe të dy bashkë janë takuar te varrezat e Stom Golemit për t'u sqaruar mes njëri- tjetrit.
I SHPETOI POLICISE NE 2018 Policia e Shkodrës në orët e mëngjesit të 15 tetorit 2018ës ka gjetur në fshatin Shtoj i Ri, në Njësinë Rrethina, në afërsi të shinave të trenit një fuoristradë, e cila ishte gjuajtur me një breshëri plumbash dhe është lënë e braktisur. Brenda fuoristradës forcat e Policisë kanë gjetur edhe njolla gjaku. Ajo që u dyshua fillimisht ishte se një person që ka qenë brenda makinës është plagosur. Në atë kohë nuk kishte asnjë lloj informacioni se ku ndodhej ai shtetas dhe se kush ishte plagosur, të paktën zyrtarisht nga Policia. Megjithatë, sipas burimeve nga vendngjarja, por edhe burime policore kishte një dyshim se bëhej fjalë për një person problematik, i cili dyshohet se ka qenë brenda fuoristradës në momentin kur është qëlluar ndaj tij. Forcat e Policisë kanë shoqëruar shumë persona në zonën ku ka ndodhur ngjarja, ndërsa po ashtu u morën në pyetje shumë të tjerë për të hedhur më shumë dritë mbi atë që ka ndodhur. Një prej të dyshuarve kryesorë, por jo i vetëm, sipas burimeve nga vendngjarja dhe Policisë ishte shtetasi Artan Koçeku. Ky i fundit, person i shpallur në kërkim që në dhjetorin e 2017- ës si autor i dyshuar për vrasjen e shtetasit Angjelin Shkambi, ngjarje e ndodhur te varrezat e Stom Golemit. Kjo vrasje dyshohet nga Policia se erdhi pas një borxhi mes viktimës dhe autorit për pazare droge. Fuoristrada, e cila është qëlluar me breshëri plumbash natën e 14 tetorit të këtij viti rezulton se kishte targa të vjedhura dhe të mbivendosura. Në Spitalin Rajonal të Shkodrës, sipas burimeve, natën e 14 tetorit 2018 nuk ka shkuar asnjë person i plagosur me armë. Vendi ku ka ndodhur ngjarja është një rrugë dytësore që nuk ka qarkullim të shpeshtë dhe larg vëmendjes së njerëzve, detaje këto që e vështirësuan punën e efektivëve. Deri më tani, kjo ngjarje nuk u bë e ditur nga Policia e Shkodrës në njoftimet e saj, ndryshe nga rastet e tjera. Policia hetoi për të zbardhur të plotë këtë ngjarje mbi autorët që kanë qëlluar fuoristradën dhe për të gjetur nëse personi i plagosur ka qenë i dyshuari Artan Koçeku apo ndonjë tjetër. Në vendngjarje ishin disa pjesë të shiritit të Policisë, që ka rrethuar zonën ku ka ndodhur ngjarja apo edhe dorezat e ekspertëve të grupit hetimor. Po ashtu është arritur që të sigurohet edhe një foto e fuoristradës së qëlluar me breshëri plumbash. Bëhet fjalë për një mjet ngjyrë e kuqe, ndërsa nga pozicioni ku është bërë fotografia nuk dallohen targat e makinës tip fuoristradë. Pas ekspertizës së bërë me gjurmët e gishtave rezultoi se në atë fouristradë ka qenë pikërisht shtetasi Artan Koçeku.