Lleshaj: Zyra e Europol në Tiranë është shenjë besimi, jo dyshimi
Nga Shkodra, ministri i Brendshëm Sandër Lleshaj, gjatë inaugurimit të ndërtesës së re të Stacionit të Policisë në Pikën e Kalimit Kufitar në Hanin e Hotit, u ktheu përgjigje deklaratave të Partisë Demokratike në lidhje me hapjen e zyrës së re të Europol në Shqipëri. Ministri Lleshaj hodhi poshtë deklaratat e PD- së, duke thënë se hapja e zyrës së Europol në Shqipëri nuk është një shenjë dyshimi për rritjen e krimit, por një shenjë besimi ndaj vendit tonë dhe një hap i rëndësishëm në rrugën e integrimit në BE. "Është me rëndësi të them edhe faktin që në këtë proces shumë të rëndësishëm modernizimi ne nuk jemi vetëm, por jemi në një bashkëpunim të ngushtë me partnerët tanë ndërkombëtarë, kryesisht me ata europianë. Është me rëndësi të ritheksojmë dhe vlerësojmë faktin që fillimi i operacionit të përbashkët për kontrollin dhe menaxhimin e kufijve të Shqipërisë në bashkëpunim me FRONTEX, si operacioni i parë që kjo agjenci e Bashkimit Europian kryen jashtë BE- së, është një mundësi e jashtëzakonshme për të rritur nivelin e bashkëpunimit, nivelin e shkëmbimit të informacionit dhe të përvojës për krijimin e besimit të domosdoshëm që ne duhet të kemi me partnerët tanë europianë dhe është po ashtu një hap mjaft i rëndësishëm në drejtim të integrimit real të vendit tonë në strukturat e BE- së. Unë jam i ndërgjegjshëm që skeptikët nuk lodhen kurrë së dyshuari dhe së shprehuri negativisht, edhe atëherë kur duhet të shprehen pozitivisht. Kam ndjekur këto ditë me njëfarë keqardhje disa njoftime, të cilat e përkthejnë ardhjen e agjencive europiane në Shqipëri si shenjë dyshimi ndaj Shqipërisë, ndërkohë që është e shpallur botërisht nga vetë BE- ja, edhe nga ne, që ardhja e tyre në Shqipëri është shenjë besimi, shenjë e një hapi të rëndësishëm integrimi të Shqipërisë drejt strukturave të BE- së dhe dje patëm mundësinë që pas FRONTEX- it të hapim edhe zyrën e Europol, si të thuash të kompletojmë praninë europiane në Shqipëri sa u përket institucioneve të sigurisë publike dhe Policisë; dhe ky është një lajm jashtëzakonisht i madh, i cili duhet të na bëjë krenarë që ne tashmë ' de facto' jemi të ndërlidhur ngushtësisht me strukturat europiane përgjegjëse për sigurinë. Jemi në pararojë të institucioneve të tjera shqiptare sa i përket kësaj ndërthurjeje dhe këtij integrimi, i cili do të sjellë rezultate të jashtëzakonshme. S. N.