ASHK Durrës, Liridon Pula: Për 2 muaj janë lëshuar 2043 tapi
Në dy muajt e fundit, vetëm nga Agjencia Shtetërore e Kadastrës janë përmbyllur procedurat e legalizimit dhe hipotekimit për më shumë se 2 mijë familje. Sipas kreut të këtij institucioni, Liridon Pula, në fokus do të jenë vetëdeklarimet e kryera përgjatë viteve 2005 dhe 2006. “Aktualisht kemi kryer bashkimin de- fakto të dy institucioneve dhe ASHK, Drejtoria Vendore e Durrësit ndodhet në ambientet e ish- ZVRPP Durrës. Për 2 muaj, përkatësisht në harkun kohor 08.05.2019- 10.07.2019, janë lëshuar 2043 certifikata pronësie, nga të cilat 348 certifikata të përfituara nga regjistrimi i lejeve të legalizimit. Sipas urdhrit të drejtorit të përgjithshëm, Artan Lame, nr. 2877, dt. 10.04.2019, duhet të mbyllim vetëdeklarimet e kryera në 2005- 2006”. Shumë shpejt pritet të përfundojnë edhe procedurat e legalizimit për zonën e ishKënetës. Drejtori i ASHK- së Durrës iu ka bërë thirrje qytetarëve që të bëhen palë me procesin, për të bërë të mundur edhe përshpejtimin e praktikave. “Specialistët e përditësimit të terrenit këto ditë ndodhen në zonën e Durrësit të ri, apo siç njihet ndryshe në zonën e ishKënetës. Kërkojmë mbështetjen e të gjithë qytetarëve të mirëpresin grupet për të kryer evidentimet përkatëse për të mbyllur përfundimisht procesin e legalizimit në këtë zonë. Çdo kërkesë e qytetarëve për sa u përket viteve të deklarimit 2005- 2006 do të konsiderohet në mënyrë të menjëhershme”. Krahas ndërtimeve pa leje, në proces regjistrimi janë edhe shtëpitë e ndërtuara përpara vitit 1991. Për këto të fundit, aplikimet mund të bëhen në çdo kohë, duke qenë se nuk ka një afat të përcaktuar. “Qytetarët, të cilët kanë paraqitur kërkesat e tyre duke u bazuar në VKM- në 442 për ndërtimet e kryera para 1991, u bëjmë me dije se është nisur trajtimi i rast pas rasti për kërkesat e para të paraqitura pranë ish- ALUIZNI- t Durrës. Ju bëjmë me dije se aplikimi i përfshirjes në këtë proces vazhdon të jetë i hapur. Të gjithë ata, të cilët e kanë pasur të pamundur plotësimin e formularit në zbatim të kësaj VKM- je, janë të lutur të paraqiten me dokumentet përkatëse”, apelon kreu i ASHK- së Durrës, Liridon Pula.