Këshilli fut në sistem gjashtë prokurorë të rinj
Këshilli i Lartë i Prokurorisë, pas përfundimit të intervistave ka zhvilluar dje mbledhjen e radhës, ku ndër të tjera ka emëruar 6 prokurorë që futen për herë të parë në sistem. KLP- ja ka bërë kontrollin e përgjithshëm të tyre, duke kërkuar informacione nga institucionet publike dhe këtë të premte vendosi t'i emërojë ata në disa prokurori të rretheve. "Në seancën plenare të sotme janë miratuar projektaktet e verifikimit të pasurisë dhe figurës për 6 të diplomuarit e Shkollës së Magjistraturës në vitin 2018 dhe emërimin e tyre si prokurorë dhe caktimin në pozicionin e prokurorëve: Eliora Elezi, Erida Visoçi, Mediana Meta, Françesk Ganaj, Odeta Todorushi dhe Albjona Papajani", njoftoi Këshilli. Kjo formë e emërimit të prokurorëve të rinj është rregulluar me anë të një metode pune, e cila dha rezultatet e para dhe do të vazhdojë në vite të përdoret. "Komisioni i Karrierës vendos themelin e një metode pune, që do të shoqërojë këtë proces në vite: vetingu i kandidatëve, të cilët emërohen prokurorë për herë të parë në hyrjen e tyre në sistem", tha dje KLP- ja. Ndërkohë, për emërimin e tyre, të gjashtë prokurorët e rinj janë pyetur për preferencat, në bazë edhe të nevojave. "KLP- ja u ka kërkuar informacion të gjitha institucioneve ligjzbatuese për këta kandidatë para emërimit të tyre si prokurorë. Këshilli u ka kërkuar kandidatëve të shprehin preferencat e tyre për caktim në pozicion sipas vendeve vakante, aktualisht në sistemin e prokurorisë dhe duke pasur parasysh nevojat e sistemit për prokurorë të rinj", njoftoi Këshilli.