PD nxjerr dokumentin për rritjen e çmimit të naftës, Spaho: Po zhvatin qytetarët
Në fund të shpjegimit të ligjit që rrit çmimin e karburanteve thuhet se “kostot mund të ndikojnë në çmimin e konsumatorit fundor"
Partia Demokratike ka akuzuar qeverinë se po rrit sërish çmimin e naftës, duke varfëruar akoma më shumë familjet shqiptare.
Nënkryetari i PD- së, Edmond Spaho, denoncoi dje nga selia blu rritjen e çmimit të naftës, duke publikuar edhe dokumentin e firmosur nga ministrja e Energjisë, Belinda Balluku, ku në fund të shpjegimit të ligjit, që rrit çmimin e karburanteve, thuhet qartë se "kostot mund të ndikojnë në çmimin e konsumatorit fundor". "Edi Rama ka vendosur të vjedhë shqiptarët duke krijuar një agjenci shtetërore, e cila do të blejë, menaxhojë dhe tregtojë një sasi të caktuar rezerve karburanti në rast krize. Ai dhe ministrja e tij e Financave gënjyen paturpësisht, kur thanë se nuk ka rritje të re të çmimit të karburanteve. Por ministrja e Energjisë, Belinda Balluku, e nxjerr në shesh këtë gënjeshtër të Edi Ramës me shpjegimet ligjore që ka çuar në Kuvend. Në fund të shpjegimit të ligjit, që rrit çmimin e karburanteve për të mbajtur me para Agjencinë e Edi Ramës, thuhet qartë se ' kostot mund të ndikojnë në çmimin e konsumatorit fundor'. Dokumenti që gjendet në faqen zyrtare të Parlamentit është prova nga vetë qeveria se ky vendim i Edi Ramës zhvat shqiptarët dhe i varfëron akoma më shumë", tha Spaho.
LIGJI Për demokratët, Shqipëria e ka të rregulluar rezervën e sigurisë së karburanteve pa kosto shtesë dhe akuzoi Kryeministrin Rama se duke rritur çmimin e naftës do të favorizojë sërish klientët e tij. "Aktualisht, Shqipëria e ka të rregulluar shumë mirë rezervën e sigurisë së karburanteve, pa kosto të tjera shtesë mbi qytetarët. Këtë gjë e bëjnë kompanitë private prej 20 vjetësh me një praktikë të konsoliduar ligjore. Kjo e bën krijimin e agjencisë së propozuar prej Edi Ramës një vendim puro hajdutëror, që rrit çmimin e karburantit dhe hap rrugën për një tjetër koncesion për klientët e Edi Ramës. Shqipëria është vendi me karburantin më të shtrenjtë në Europë, pasi Edi Rama vendosi 4 vjet më parë edhe taksën e qarkullimit 270 lekë për litër. Kjo ndërhyrje e re e qeverisë për të rritur sërish çmimin nëpërmjet një takse tjetër është goditje direkte për qytetarët, 31 për qind e të cilëve nuk mbyllin dot muajin dhe nuk ushqejnë dot plotësisht fëmijët", theksoi nënkryetari i PD- së.
ALTERNATIVA Për demokratët, vendimi i marrë nga qeveria për rritjen e naftës është nga ato vendime që i referohet edhe raporti i Departamentit Amerikan të Shtetit, i cili e vlerësonte Shqipërinë si vendin me qeverinë më të korruptuar në Ballkan. Spaho u shpreh se Partia Demokratike ka gati planin për rimëkëmbjen e vendit. "Ky është një nga ato vendime për të cilat Departamenti Amerikan i Shtetit e cilësoi për herë të parë Shqipërinë si vendin me qeverinë më të korruptuar në Ballkan. Ajo që na duhet është të largojmë këtë bandë hajdutësh që po thellon çdo ditë e më shumë krizën. Duke larguar këtë qeveri, që punon kundër interesit të qytetarëve shqiptarë, ne do t'i hapim rrugë, me zgjedhje të lira e të ndershme, një qeverie që punon për qytetarët. Partia Demokratike e ka gati planin për rimëkëmbjen emergjente të vendit! Ne do të anulojmë që ditën tonë të parë në qeverisje taksën ' Rama' mbi karburantet. Ne do ta ulim me 300 lekë më pak çmimin për çdo litër naftë", theksoi Spaho. PD është duke punuar për një riorganizim të strukturave, duke premtuar se në shtator do të ketë zhvillime të forta politike.