“Aferat e Ramës ndalen me protesta”, Shehaj: Taksë korruptive

Ish- deputeti i Partisë Demokratike, Agron Shehaj, u ka bërë thirrje shqiptarëve të bashkohen në protestën që do të zhvillohet ditën e sotme kundër rritjes së çmimit të naftës. Përmes një reagimi në rrjetet sociale, Shehaj kujtoi se Kryeministri Rama, njësoj si me taksën 5 euro të vendosur për koncesionin e Rrugës së Kombit do të rrisë çmimin e naftës për t'i ndarë me oligarkët. "Rama nuk ndalet, si në rastin e taksës prej 5 eurosh të koncesionit të Rrugës së Kombit, taksa e re mbi naftën që do të paguajnë shqiptarët do të kalojë direkt në xhepat e miqve të Ramës. Skema është e njëjta, qeveria u merr para shqiptarëve dhe i ndan me oligarkët për shërbime të panevojshme me vlera të pajustifikuara: 15 mln në vit për koncesionin e Rrugës së Kombit, 12 mln në vit për Check up dhe tani 12 mln euro në vit për rezervat që akoma nuk e dimë se kujt do t'i shkojnë", u shpreh Shehaj. Për ish- deputetin demokrat edhe ish- anëtarin e Komisionit të Ekonomisë, aferat e qeverisë Rama mund të ndalen vetëm përmes protestave, ndaj edhe ka apeluar që të gjithë qytetarët të bashkohen në vendimin për të fikur automjetet mesditën e sotme në shenjë proteste ndaj ligjit të qeverisë. "Aferat korruptive të kësaj qeverie ndalohen vetëm me protesta, si në rastin e Teatrit dhe të Unazës së Madhe. Prandaj i ftoj të gjithë t'i bashkohen thirrjes për protestë kundër taksave mbi naftën. Në kushtet e kapjes totale të ekonomisë nga Rama dhe miqtë e tij, protesta qytetare është mënyra e vetme për ta ndalur", theksoi Shehaj. Në një mesazh të shpërndarë në rrjetet sociale nga aktivistë të shoqërisë civile është kërkuar që të gjithë qytetarët të fikin automjetet ditën e sotme në rrethrrotullime dhe kryqëzime, nga ora 12: 00- 15: 00. "Ditën e hënën, datë 15 korrik. Të gjithë drejtuesit e automjeteve të fikin automjetet e tyre në rrugë, rrethrrotullime dhe kryqëzime, prej orës 12: 00- 15: 00, në shenjë proteste për uljen e çmimit të naftës, minimumi në 150 lekë për litër. # nafta150lekë", thuhet në mesazhin e protestës.