Jahti me turistë serbë rrezikoi të mbytej, shpëtohen nga roja bregdetare

VLORE – Jahti me turistë nga Serbia rrezikoi të mbytej, shpëtohen nga roja bregdetare. Jahti “Lamacoia”, 23 metra i gjatë, me flamurin italian pësoi defekt mbrëmjen e së shtunës. Në bordin e jahtit kanë qenë 7 persona me kombësi serbe. Alarmin për një defekt në motor, por më pas të konstatuar edhe për mungesë karburanti, kapiteni i jahtit e ka dhënë në afërsi të Lagunës së Karavastasë, ndërsa shtatë personat në bord kanë lajmëruar se ndiheshin në rrezik dhe për shkak të motit jo fort të mirë dhe detit më dallgë. Lajmërimi nga Drejtoria e Përgjithshëm në Durrës është dhënë drejt Vlorës si zona më e afërt për t’i ardhur në ndihmë jahtit me flamur italian, ndërsa pavarësisht rrezikut në det, personat në bord kanë lajmëruar se ata ndiheshin mirë. Rreth orës 19: 35, të mbrëmjes së të shtunës, në drejtim të jahtit është nisur anija P- 116 për në rajonin ku edhe ndodhej mjeti në rrezik, ndërsa është komunikuar me këta të fundit nëpërmjet radios. Veç anijes P- 116, në drejtim të mjetit në rrezik është nisur edhe mjeti i Guardia di Finanza nga Durrësi dhe një tjetër mjet i Guardia di Finanza nga Rradhima në Vlorë, rreth orës 21: 30. Pas mbërritjes në zonën ku ndodhej jahti në rrezik, rreth orës 22: 20 të së shtunës, nisi dhe përgatitja për rimorkimin e mjetit drejt portit të Vlorës, ndërsa rreth orës 04: 10 të mëngjesit të së dielës, anija RB mbërriti me jahtin e rimorkiuar në Portin e Vlorës. Gjendja e ekuipazhit ishte e mirë dhe ata nuk kishin probleme, ndërsa mësohej se jahti vinte nga Greqia. Rreth orës 10: 20, jahti me flamur italian, pasi është furnizuar dhe me karburant, ka dalë nga Porti i Vlorës për t’u larguar në drejtim të Durrësit.