I dënuar për falsifikim, i bllokohen 4 makina luksi
Bllokohen një "Porsche" dhe një "Mustang", në kërkim 4 të tjera
U ekstradua në Itali i akuzuar për falsifikim, i bllokohen katër automjete luksoze.
Ilir Lufaj, 43 vjeç, banues në Fushë- Mamurras, pak kohë pas ekstradimit në vendin fqinj, hetuesit e Krimit Ekonomik e Financiar në Policinë Lezhë në bashkëpunim me Prokurorinë e Kurbinit i kanë vënë nën sekuestro preventive katër makina luksi. Mes tyre janë një makinë tip "Porsche" dhe "Mustang". Përveç bllokimit të këtyre makinave që kanë një vlerë mijëra euro, mësohet se janë dhe katër makina të tjera luksi që janë regjistruar në emër të familjarëve të Lufajt, por që hetuesit nuk i kanë zbuluar ende se ku ndodhen. Bllokimi i automjeteve është bërë nisur nga dyshimet se janë blerë duke pastruar para, të cilat janë siguruar nga aktivitete kriminale. Ilir Lufaj akuzohet nga drejtësia italiane se është pjesë e një grupi kriminal, që merrej me grabitje kryesisht në zonën e Mantovës. Pjesë e grupit dyshohet se ka qenë dhe një prej vëllezërve të tij, i cili gjithashtu është arrestuar nga autoritetet italiane. Për sekuestrimin e katër automjeteve, Gjykata e Shkallës së Parë Kurbin ka dhënë vendim më 10 korrik, ndërkohë që punohet për gjetjen dhe sekuestrimin edhe të katër automjeteve të tjera luksoze, të regjistruara në emër të familjarëve të 43- vjeçarit.
"Specialistët për Hetimin e Krimit Ekonomik e Financiar në Drejtorinë Vendore të Policisë Lezhë, nën drejtimin e Prokurorisë pranë Gjykatës së Shkallës së Parë Kurbin, zhvilluan operacionin policor ' LUKSI', për vendosjen e sekuestros preventive të disa automjeteve të shtetasit I. L., i ekstraduar në Itali për veprat penale ' Falsifikim i dokumenteve' dhe ' Grup i strukturuar kriminal'. Operacioni u zhvillua në funksion të procedimit penal të vitit 2019, regjistruar për veprën penale ' Pastrimi i produkteve të veprës penale apo veprimtarisë kriminale'. Bazuar në vendimin e datës 10.07.2019 të Gjykatës së Shkallës së Parë Kurbin, u vendos sekuestro preventive për katër automjete luksoze në pronësi të shtetasit I. L.. Gjithashtu po punohet për gjetjen dhe sekuestrimin edhe të katër automjeteve të tjera luksoze, të regjistruara në emra të familjarëve të shtetasit I. L.. Policia në bashkëpunim me Prokurorinë e Rrethit Gjyqësor Kurbin po vijon punën për dokumentimin e plotë të aktivitetit të paligjshëm të këtij shtetasi, si dhe identifikimin e personave të tjerë të përfshirë", bëhet e ditur zyrtarisht nga Policia.