Dita e Bastijës, Macron shfaq fuqinë e re ushtarake
Nëndetëse "Barracuda", komandë hapësinore e "ushtarë fluturues"
Franca ka festuar Ditën Kombëtare me një paradë madhështore ushtarake jo vetëm franceze, në prani të liderëve nga shumë vende europiane, përfshirë Kancelaren gjermane Angela Merkel, Kryeministrin holandez Mark Rutte, Presidentin portugez, Marcelo Rebelo, Presidentin shqiptar, Ilir Meta etj..
Dita e Bastijës përkujton shpartallimin e burgut të Bastijës në vitin 1789, një nga ngjarjet kryesore të Revolucionit Francez. Dita është bërë festë kombëtare në Francë. Në një mesazh për francezët, Macron tha se donte të theksonte përkushtimin e pakthyeshëm të Francës për të konsoliduar sigurinë franceze dhe europiane. "Kurrë, që nga përfundimi i Luftës së Dytë Botërore, Europa nuk ka qenë kaq e nevojshme. Ndërtimi i një Europe mbrojtjeje, të lidhur me Aleancën Atlantike ... është një prioritet për Francën", tha Macron. "Të veprojmë së bashku dhe të forcojmë aftësinë tonë për të vepruar kolektivisht, është një nga sfidat që Iniciativa për Ndërhyrje Europiane, së bashku me projektet e tjera europiane, dëshiron të trajtojë", shtoi ai.
PARADA
Parada e Ditës së Bastijës këtë vit në Paris u nderua më një bashkëpunim ushtarak europian. Trupa nga 10 vende pjesëmarrëse të Iniciativës Europiane të Ndërhyrjes parakaluan përgjatë "ChampsElysee". Iniciativa e drejtuar nga Franca, e cila përfshin Gjermaninë, Belgjikën, Britaninë, Danimarkën, Estoninë, Holandën, Spanjën dhe Portugalinë, nisi vitin e kaluar. Macron u përpoq të paraqiste fuqinë e shtuar ushtarake europiane. Në paradë morën pjesë rreth 4000 anëtarë të forcave të armatosura, 200 mjete dhe 100 avionë. Paraqitjet teknologjike përfshinin dronë, mjete autonome në miniaturë, ushtarë të armatosur me armë antidronësh dhe ai që u duk si një "ushtar fluturues", një burrë që lëvizte në ajër mbi një bord fluturues, i cili u duartrokit fort nga liderët dhe spektatorët.
NËNDETËSJA "BARRACUDA"
Të premten, para Ditës së Bastijës, Presidenti francez, Emmanuel Macron, ka zbuluar nëndetësen më të madhe të Francës me fuqi nukleare, të quajtur "Barracuda", një projekt i fshehtë 9 miliardë eurosh për të cilin Parisi thotë se është thelbësor për të mbajtur të pranishme flotën e tij për dekadat e ardhshme. Sipas "Euronews", duke iu drejtuar atyre që kanë punuar në projektin e nëndetëseve, Macron tha: "Nuk janë thjesht nëndetëse ato që po ndërtoni këtu. Ajo që po ndërtoni është në të vërtetë pavarësia e Francës. Ajo që po ndërtoni është sovraniteti ynë". Qeveria franceze ka porositur gjashtë nëndetëse 5,000 tonësh të krijuar nga "Naval Group", një kompani mbrojtjeje. Nëndetësja e parë, e cila do të quhet "Suffren", besohet se do të jetë në gjendje për t'u provuar në det në vitin 2020 dhe do të hyjë në shërbim brenda dekadës së ardhshme. "Ka një nevojë thelbësore që të jemi të pranishëm në zona konflikti ... dhe të jemi në gjendje të paraqesim një kërcënim kur të jetë e nevojshme", tha për mediat franceze, gjeneral Francois Lecointre, shefi i Stafit të Mbrojtjes në Francë.
KOMANDA HAPËSINORE
Presidenti francez, Emmanuel Macron, njoftoi krijimin e një komande të hapësirës: "Për të garantuar zhvillimin dhe përforcimin e kapaciteteve tona hapësinore, një komandë e madhe e hapësirës do të krijohet në shtator si pjesë e Aeronautikës, që në fund do të shndërrohet në një forcë ushtarake e ajrit dhe hapësirës", theksoi Macron, duke shtuar se kjo komandë është projektuar nga ministrja e Mbrojtjes, Florence Parly, dhe do mundësojë garantimin e mbrojtjes së hapësirës. Macron ka folur për sfida të reja si hapësira kibernetike dhe hapësira jashtë atmosferike.