Legalizimet, familjet që marrin tapinë në Tiranë
Agjencia Shtetërore e Kadastrës ka publikuar emrat e përfituesve të rinj të legalizimeve në Tiranë. Ligji i ri, 60 ditë afat për regjistrimin e lejes
Përfundojnë procedurat e legalizimit për 580 familje në kryeqytet. Agjencia Shtetërore e Kadastrës ka publikuar dje emrat e përfituesve, të cilët duhet të paraqiten pranë Drejtorisë Tirana Rurale për të tërhequr lejen e legalizimit.
Menjëherë pas kësaj faze nis edhe regjistrimi dhe dhënia e certifikatës së pronësisë. Ligji i ri parashikon një afat 60ditor për përmbylljen e kësaj praktike. Ndërsa për ata, të cilët duan të përshpejtojnë procedurat, mund ta bëjnë këtë, por duke paguar një faturë ekstra. "ASHK, brenda 60 ditëve nga përfundimi i procedurave të kualifikimit, legalizon ndërtimin, duke respektuar dispozitat e legjislacionit në fuqi për regjimet pasurore martesore. Poseduesi i ndërtimit pa leje ka të drejtë të kërkojë kryerjen e procedurave të legalizimit brenda 30 ditëve, kundrejt pagesës së një tarife shërbimi shtesë", përcaktohet në ligjin e ri. APLIKIMET
Prej më shumë se dy muaj, Agjencia e Kadastrës u ka dhënë përparësi vetëdeklarimeve të kryera përgjatë vitit 2005 dhe 2006. Me anë të një urdhri të firmosur në prill të këtij viti, kreu i ASHK- së, Artan Lame, ka kërkuar nga të gjitha drejtoritë në rrethe që të përmbyllin praktikat për aplikimet e bëra herët. Ndaj edhe të gjitha ato familje që kanë kryer procedurat e deklarimit në vitin 2005 dhe 2006, mund të paraqiten pranë zyrave të Agjencisë dhe pajisja e tyre me certifikatën e pronësisë do të bëhet pa vonesa. APARTAMENTET
Prej vitit 2017 po vijon puna edhe për hipotekimin e pallateve pa leje. Sipas Agjencisë, vendosja e një përfaqësuesi, kopjet e vetëdeklarimeve/ kontratave, si edhe lista e banorëve janë bazike për fillimin e procedurave. Janë mbi 30 mijë familje që gjenden në situatën kur kanë blerë shtëpi, por nuk disponojnë asnjë dokument pronësie. Përgjatë dy viteve, vetëm në kryeqytet, rreth 7 mijë familje e kanë zgjidhur këtë problem duke u pajisur me certifikatën e pronësisë. Ndërkohë vijon procesi për pjesën e mbetur. Agjencia e Kadastrës iu ka bërë thirrje qytetarëve që janë në këtë situatë të paraqiten për të dorëzuar dokumentet që disponojnë. Kujtojmë që procesi për hipotekimin e pallateve pa leje nuk është i kufizuar apo i limituar në afat, duke iu dhënë në këtë mënyrë mundësinë këtyre familjeve të paraqiten në çdo kohë.