Meta: Gati ta negocioj 13 tetorin për zgjedhje
“Nuk çelen negociatat me qoka ndërkombëtare, por vetëm me standarde”
Presidenti Ilir Meta u shpreh i gatshëm të rishohë datën 13 tetor në funksion të zhvillimit të zgjedhjeve gjithëpërfshirëse, që do t’i jepnin fund krizës politike.
Në një prononcim për gazetarët nga Xhafzotaj i Durrësit, kreu i shtetit u kërkoi palëve që kriza të zgjidhet para vendimit të Këshillit Europian për hapjen e negociatave. “Jam fleksibël, meqenëse mund t’i ketë dalë ters në filxhan 13 tetori, që ta rishikoj këtë datë, por përpara 17- 18 tetorit, në çdo moment do të ishte i mirëpritur. Unë kam kaq kohë që po e pres me shumë durim, por edhe me shpresë për të dhënë një zgjidhje të përgjegjshme. Përndryshe, kjo krizë do të vazhdojë të përshkallëzohet dhe askush nuk duhet të mendojë që do të dalë me kosto zero. Të gjithë e kemi të qartë se nëse përpara kësaj date, pra 17- 18 tetorit, ne nuk do të arrijmë të organizojmë zgjedhje gjithëpërfshirëse vendore dhe njëkohësisht të gjejmë një formulë për kapërcimin e kësaj krize, provimi i vjeshtës është i pakalueshëm”, tha Meta. Kreu i shtetit i cilësoi vendimet e disa gjykatave, të cilat nuk po njohin disa kryetarë bashkish, si në Durrës apo në Vorë, si rrëmujëhanë ligjore, për sa kohë 30 qershori, sipas tij, nuk është legjitim. “Çdo proces gjyqësor që vazhdon të zhvillohet është një pasqyrim i rrëmujëhanes ligjore, që, për fat të keq, vazhdon në vendin e në shtetin tonë. Duhet ta kenë të qartë të gjithë qytetarët shqiptarë se nuk ka pasur zgjedhje të qytetarëve shqiptarë, zgjedhje shtetërore, zgjedhje kushtetuese, zgjedhje ligjore më 30 qershor. Le të thotë kush të dojë e çfarë të dojë, çdo shqiptar e çdo ndërkombëtar se gomari fluturon! Kështu që të gjitha këto manovra, këto përpjekje e manipulime, të gjithë këto qoka, përfshirë edhe qokat ndërkombëtare, shkojnë kundër standardeve ndërkombëtare, të cilat Shqipëria është e detyruar t’i plotësojë, sidomos përsa u takon zgjedhjeve të lira e të drejta dhe sundimit të ligjit, që janë një standard i panegociueshëm për të marrë provimin e vjeshtës”, tha Meta.
ZGJIDHJA
Presidenti u shpreh i gatshëm që të punojë me palët për të tejkaluar krizën politike të përfaqësimit në institucione dhe në zgjedhje. “Nuk e kalojmë dot këtë provim pa bërë zgjedhje gjithëpërfshirëse, të standardeve demokratike. Kjo është një gjë që nuk kalohet dot! Nuk arrihet çelja e negociatave të anëtarësimit me qoka ndërkombëtare! Vetëm me standarde ndërkombëtare, me standarde europiane! Ata të cilët na e duan të mirën, na e kanë thënë hapur dhe të paktën unë, Edi Rama dhe Lulzim Basha këtë gjë e dimë shumë mirë! Ata si të dëshirojnë! Dëshirojnë ndonjë zgjidhje? Janë të mirëpritur në Presidencë në çdo moment! Unë do të mbaj gjithmonë qëndrimin më të ndershëm, më të drejtë e më parimor! Duan ta zgjidhin diku tjetër? Ata e dinë që është një adresë serioze ku mund të shkojnë, ta diskutojnë, ta zgjidhin këtë çështje dhe unë po u jap mbështetjen maksimale. Duan të bëjnë pingpongun e përgjegjësisë e të fajit? Dakord! 19 tetori do të vijë. Është i pashmangshëm”, tha Meta. I pyetur për takimin me kreun e opozitës, Lulzim Basha, Presidenti tha se nuk i imponohet askujt në vendimet e tij. “Nuk i imponohem askujt në vendimet e tij. Në momentin që shkohet në zgjedhje të ligjshme, është detyra ime të kërkoj që qeveria të japë një garanci, – sepse ajo duhet ta japë gjithmonë garancinë që zgjedhjet të jenë të lira e të ndershme, – ashtu sikurse opozita të jetë e përgjegjshme për të marrë pjesë në këto procese demokratike. Në rast se opozita nuk dëshiron të marrë pjesë në një proces të ligjshëm, opozita, fjala vjen Partia Demokratike, LSI- ja, disa parti të tjera, atëherë jam i sigurt që do të inkurajohen disa forca të tjera politike, të cilat të paktën të kenë kandidatë në të gjithë Shqipërinë e të regjistrohen në kohë”, tha Meta.