Basha nuk ndryshon qëndrim: Zgjedhje të lira pa Edi Ramën
“Qeveri tranzitore pa Edi Ramën, që garanton lirinë e votës dhe ndëshkimin nga drejtësia të hajdutëve të zgjedhjeve”
“Në Vjenë, me përfaqësuesit e lartë të OSBE, ndamë shqetësimin për krizën dhe qëndrimin e pandryshuar të opozitës së bashkuar: zgjedhje të lira e të ndershme me një qeveri tranzitore pa Edi Ramën
Kreu i PD- së, Lulzim Basha, nuk tërhiqet nga kërkesat e opozitës së bashkuar për largimin e Ramës si Kryeministër dhe krijimin e një qeverie tranzitore.
Në Vjenë, ku ka takuar përfaqësues të lartë të OSBE- së, kreu i opozitës shprehet se ka ndarë me ta shqetësimin për krizën në vend, si dhe qëndrimin e pandryshuar të opozitës së bashkuar. “Në Vjenë, me përfaqësuesit e lartë të OSBE, ndamë shqetësimin për krizën dhe qëndrimin e pandryshuar të opozitës së bashkuar: zgjedhje të lira e të ndershme me një qeveri tranzitore pa Edi Ramën, që garanton lirinë e votës dhe ndëshkimin nga drejtësia të hajdutëve të zgjedhjeve”, shkruan Basha në “Twitter”. Kjo deklaratë e Bashës vjen si qëndrim i konsoliduar tashmë i opozitës pas protestës së 8 korrikut dhe zgjedhjeve të 30 qershorit. Në disa dalje, përfaqësues të opozitës, përfshirë dhe Lulzim Bashën, në një përpjekje për të krijuar një klimë komunikimi, nuk artikuloi largimin e Kryeministrit Rama si kusht për gjetjen e një zgjidhjeje politike të krizës. Madje, kjo deklaratë ishte e qartë dhe në protestën e parë që opozita zhvilloi para Kryeministrisë një javë, pas zgjedhjeve lokale të 30 qershorit, kur kryedemokrati kërkoi daljen para drejtësisë të atyre që dolën në përgjimet e dosjes “184” të zgjedhjeve në Dibër. “Ata që e kanë sjellë vendin në këtë vend, ata që sollën krimin në politikë, ata që u korruptuan, nuk do të dalin nga kriza si shpëtimtarë, por si përgjegjës. Vetëm kjo e shpëton të ardhmen europiane të Shqipërisë: Nxjerrja e politikanëve të lidhur me krimin para drejtësisë së pavarur. Vetëm drejtësia përmes ligjit. Dua ta deklaroj para gjithë botës: Derisa të dalin para drejtësisë ata që vodhën votat e shqiptarëve, bashkë me krimin, nuk do të ketë zgjidhje politike. Ne do të bëjmë çdo përpjekje, do të përdorim çdo mjet për t’i nxjerrë ata para drejtësisë. Asnjë marrëveshje politike për daljen nga kriza nuk do mund të arrihet nëse pika numër 1 e saj nuk është ndëshkimi i vjedhësve të votave”, deklaroi kreu i PD- së në protestën e 8 korrikut. Partia Demokratike ka nisur përgatitjet për një sezon të nxehtë politik në vjeshtë. Kreu demokrat, Lulzim Basha, i cili përshëndeti dekretin e Presidentit Meta për datën 13 tetor, ka kërkuar riorganizimin e partisë në të gjithë strukturën e saj. Ish- deputetët dhe forumet drejtuese kanë marrë porosi të drejtojnë riorganizimin e PD pasi sipas Bashës, në shtator do të ketë zhvillime të forta politike.