Investim në “Misto Mame”, Veliaj: Punojmë përgjatë gjithë verës
Edhe pse është piku i verës dhe shumica e punonjësve marrin zakonisht pushimet, Bashkia e Tiranës nuk ndalet me investime e punime në çdo kapilar rruge. Fatin kësaj radhe e kishte zona e “Misto Mames”, në afërsi të ishKombinatit, ku një bllok banimi është transformuar tërësisht. Bëhet fjalë për hapësirën që kufizohet nga rruga “Konferenca e Pezës” – “3 Dëshmorët” dhe rruga “Ali Jegeni”. Teksa inspektonte punimet, kryetari i bashkisë, Erion Veliaj, përfitoi nga rasti të japë një lajm të mirë për banorët e zonës ngjitur me “Misto Mamen”. “Po përgatisim kopshtin dhe çerdhen e re në Kombinat, pastaj do të fillojmë shkollën e re tek zona e ‘ Astirit’. Nuk ka asnjë dyshim që do të bëhet autostrada e ‘ Astirit’ dhe nuk ka asnjë dyshim që ajo autostradë do t’i nxjerrë të gjithë fitues. Disa do t’i nxjerrë fitues duke u shpronësuar dhe duke i marrë paratë kesh në dorë, disa do t’i nxjerrë fitues duke qenë në kufi të asaj prone ku do të ketë zhvillime dhe secili do të marrë përqindjen e tij të zhvillimit”. Veliaj shtoi se puna do të vijojë gjatë gjithë verës, në mënyrë që qytetarët kur të kthehen nga pushimet të gjejnë një infrastrukturë më të mirë. “Ka fushatë, s’ka fushatë, mbaruam zgjedhjet në datën 30 qershor dhe nga 1 korriku e deri më sot do vazhdojmë kështu përditë, edhe gjatë pushimeve të verës, për të rikuperuar kohën e shirave, por sigurisht për të shfrytëzuar faktin që banorët janë me pushime”. Kryebashkiaku vlerësoi bashkëpunimin e komunitetit për të lëshuar hapësirë nga prona e tyre për ndërtimin e trotuareve dhe bëri thirrje që ky shembull të ndiqet edhe në projekte të tjera, të cilat janë shtrirë në gjithë kryeqytetin.