Plagosje dhe falsifikim lekësh, arrestohet i kërkuari
Gjatë operacionit u sekuestruan 3 armë dhe municion luftarak
Policia e Tiranës njoftoi dje arrestimin e Arben Seferit, i shpallur në kërkim për plagosjen e katër personave në vitin 2017, ndërsa bashkë me të është vënë në pranga edhe shtetasi Xhevahir Marku.
Sipas Policisë, Seferi është drejtues i një grupi kriminal, për të cilin është duke u hetuar për zbardhjen e disa ngjarjeve. Gjatë operacionit për arrestimin e këtyre personave, Policia ka sekuestruar edhe 3 armë zjarri e municione të tjera luftarake. "Arrestohen dy shtetas, njëri prej tyre kreu i një grupi të strukturuar kriminal në fushën e krimeve ndaj personit, i dyshuar për disa ngjarje të rënda kriminale. Sekuestrohen tri armë zjarri dhe municion luftarak", njoftoi Policia.
ARRESTIMI Duke iu referuar burimeve zyrtare, operacioni për arrestimin e Arben Seferit dhe Xhevahir Markut u zhvillua në lagjen "Demokracia" në qytetin e Mamurrasit, ku në momentin e kapjes dy shtetasve u janë gjetur dhe sekuestruar në cilësinë e provës materiale 2 armë zjarri tip GLOCK, së bashku me 4 karikatorë me 60 fishekë luftarakë, si dhe 1 armë zjarri pistoletë TT model 54, së bashku me dy karikatorë me 15 fishekë. "Në bazë të informacioneve të siguruara në rrugë operative për vendndodhjen e një presoni të kërkuar, kreu i një grupi të strukturuar kriminal dhe pas një pune të mirorganizuar, nga Sektori i Hetimit të Krimeve Ndaj Jetës dhe Pronës, në Drejtorinë Vendore të Policisë Tiranë në bashkëpunim me Drejtorinë e Forcës së Posaçme Operacionale, në Drejtorinë e Përgjithshme të Policisë së Shtetit, u finalizua me sukses operacioni policor ' VERSACE', si rezultat i të cilit u bë arrestimi në flagrancë i shtetasve: A. S., 37 vjeç, banues në Tiranë dhe Xh. M., 35 vjeç, banues në Fushë- Mëzez, Tiranë", shkruhej në njoftimin e Policisë.
VENDIMI Gjykata e Rrethit Gjyqësor Tiranë, me vendimin penal të vitit 2017, ka caktuar masën e sigurisë "Arrest në burg" për veprën penale "Vrasja në rrethana të tjera të cilësuara" mbetur në tentativë në bashkëpunim dhe "Mbajtja pa leje e armëve luftarake" për Arben Seferin. Këtij të fundit i kanë mbetur dhe 2 vite e 6 muaj për të vuajtur dënimin në bazë të vendit të Gjykatës së Apelit dhënë në vitin 2018, për veprat penale "Falsifikimi i kartëmonedhave" dhe "Prodhimi dhe mbajtja pa leje e armëve luftarake dhe municionit".