Tentoi t’ia hidhte Policisë Kufitare, kapet shkodrani

I dënuari për drogë ndryshoi identitet për të shmangur arrestimin

Ishte në kërkim nga drejtësia italiane, kapet në Rinas 40vjeçari nga Shkodra.

Pasi kishte arritur të ndryshonte identitetin, nga Nikel në Domi Vuksani, tentoi që të hynte në territorin e Shqipërisë duke udhëtuar me avion nga Italia. Por, gjatë kontrollit nga Policia Kufitare e Rinasit në bashkëpunim me Interpol Tirana, u zbulua se 40vjeçari ishte person i shpallur në kërkim ndërkombëtar. Shkodrani rezulton se është dënuar nga një gjykatë në Firence me 12 vite burg për akuzat “Organizatë kriminale” dhe “Trafik i lëndëve narkotike”. Pavarësisht se 40vjeçari vijonte të jetonte në Itali, kishte arritur t’iu shmangte karabinierëve duke përdorur një emër të dytë dhe duke ndryshuar pamjen. Por, gjatë kontrollit në Rinas, Nikel Vuksani është “tradhtuar” nga shenjat e gishtërinjve. Pas konstatimit se bëhej fjalë për të njëjtin person që është dënuar në vendin fqinj, Policia e ka arrestuar 40vjeçarin me qëllim ekstradimin për në Itali, ku do të duhet të vuajë dënimin me burg. Vuksani mësohet se ishte person i shpallur në kërkim ndërkombëtar prej 5 vitesh, pasi dënimi i Gjykatës në Firence për dënimin e tij me 12 vite burg është dhënë që prej vitit 2014. Por, gjatë kësaj kohe mësohet se ka qëndruar i fshehur po në Itali. Pasi ka qëndruar për shumë vite pa u kthyer në atdhe, shkodrani me ndryshimin e identitetit ka shpresuar se nuk do të identifikohet. Ai ka kaluar me sukses kontrollin në aeroportin italian, por plani i tij ka dështuar para Policisë Kufitare të Rinasit. “Policia Kufitare e Rinasit në bashkëpunim me Interpol Tirana arreston në Rinas një shtetas të shpallur në kërkim ndërkombëtar për veprat penale ‘ Organizatë kriminale’ dhe ‘ Trafik i lëndëve narkotike’. Arrestohet në hyrje për në Shqipëri 40- vjeçari, i dënuar nga drejtësia italiane me 12 vjet burg. Shërbimet e Komisariatit të Policisë Kufitare Rinas në bashkëpunim me Interpol Tirana, pas verifikimeve të imtësishme të bërë në sistem të të dhënave të 40- vjeçarit, i cili kishte ndërruar gjeneralitetet me qëllim shmangien e dënimit në Itali, kanë bërë arrestimin provizor me qëllim ekstradimin në Itali të shtetasit shqiptar Domi Vuksani alias Nikel Vuksani, 40 vjeç, lindur në Shkodër. Shtetasi Domi Vuksani ishte i shpallur në kërkim ndërkombëtar nga Interpol Roma në vitin 2014, pasi Gjykata e Firences/ Itali e ka dënuar me 12 vjet burg”, bëhet e ditur nga Policia.