Xhafaj: Reformën në Drejtësi s’ka forcë që ta ndalë
“Mbështetja e OPDAT e Euralius, vendimtare edhe për zbatimin e Reformës”
Deputeti socialist, në vigjilje të 22 korrikut, ka përshëndetur kontributorët kryesorë, që hartuan dhe mbështetën implementimin e Reformës në Drejtësi. Kreu i shtetit e ka cilësuar Reformën në Drejtësi ‘ Ramaformë’, por ish- kryetari i Komisionit të Posaçëm për Reformën në Sistemin e Drejtësisë shprehet se nuk ka forcë që ta ndalë. Xhafaj ka përshëndetur kontributorët kryesorë që hartuan dhe mbështetën implementimin e Reformës në Drejtësi. Një prej tyre është edhe këshilltari ligjor rezident i OPDAT në Tiranë, gjyqtari amerikan Jon Smibert, i cili asistoi nga fillimi deri në fund gjithë procesin e Reformës. “Në një ceremoni emocionuese në rezidencën e ambasadës amerikane kishim nderin dhe privilegjin të përshëndetemi me kolegun dhe mikun tonë Jon Smibert, në mbyllje të mandatit të tij si këshilltar ligjor rezident i OPDAT në Tiranë. Vlerësimet më të mira për kontributin e tij të jashtëzakonshëm në hartimin dhe jetësimin e Reformës në Drejtësi. I paçmuar kontributi i tij profesional në hartimin e projektit kushtetues dhe ligjeve për Prokurorinë, SPAK dhe vetingun për t’i formësuar ato në standardet më të mira. Faleminderit Jon për bashkëpunimin e shkëlqyer që bashkë kemi pasur! Të sigurojmë që ngelesh një mik special dhe një bashkëpunëtor i vyer i ekspertëve. Mirënjohje për gjithë çfarë bëre në këto vite për Reformën në Drejtësi dhe për bashkëpunimin midis dy vendeve tona mike. Shqiptarët të kanë dhënë një vend nderi në rrethin e miqve të tyre. Suksese në përgjegjësitë e reja në vendin tënd”, shkruan Xhafaj. Sipas tij, me mbështetjen e OPDAT- it dhe Euralius- it, Reforma në Drejtësi u bë realitet dhe do të japë frytet e saj. “Mbështetja e drejtpërdrejtë dhe e vazhdueshme e SHBA dhe BE përmes OPDAT dhe Euralius kanë qenë dhe mbeten vendimtare për fatin e Reformës në Drejtësi, garanci thelbësore për të. Dje për standardet më të mira në hartimin e Reformës në Drejtësi, sot në jetësimin e saj me ngritjen e institucioneve të reja dhe nesër për përgjegjshmërinë dhe eficencën e tyre në dhënien e drejtësisë të barabartë për cilindo dhe kryesorja për dhënien fund të fenomenit të pandëshkueshmërisë ndaj korrupsionit në nivelet e larta. Reforma është në rrugën e duhur. S’ka forcë që ta ndalë”, përfundon Xhafaj.