“Zgjedhjet në Kushtetuese”, Ademi: Lexuam raportin e ODIHR, dritë në fund të tunelit
Kryetarët e bashkive të djathta janë të bindur se nëse drejtësia do të funksionojë siç duhet dhe jo si në rastin e Gjykatës së Durrësit, zgjedhjet e 30 qershorit do të rrëzohen. Në një intervistë për emisionin “Kjo Javë” në “News 24”, kryetarja në detyrë e Bashkisë së Shkodrës, Voltana Ademi, theksoi se vendimi për t’iu drejtuar Gjykatës Kushtetuese erdhi pas thirrjes së ndërkombëtarëve. “Ne e kemi dëgjuar me shumë vëmendje raportin paraprak të 30 qershorit, e kujtoj edhe këtu që një ndër shënimet që ata bëjnë, është që ne duhet të gjejmë zgjidhje brenda institucioneve, dhe në këtë rast duhet të shohim gjithnjë mundësinë për dritë në fund të tunelit. Në këtë rast, është Kushtetuesja që mund ta bëjë këtë. Për momentin, ne nuk e kemi funksionale, por pas diskutimeve, është i vetmi institucion që mund të çojë në zgjidhje. Pavarësisht se kërkon kohën e vet, është një proces i gjatë, unë e shoh si mënyrën që duhet të ndjekim. Ajo që kemi bërë në kohë është konsultimi i mirë, pasi nuk kemi një precedent më parë. Unë nuk jam juriste, por është e vështirë të gjesh një rast të tillë jo vetëm në Shqipëri. Kështu që kemi qenë të kujdesshëm. Uroj të bëhet objekt i shqyrtimit, në momentin që do funksionojë. Ka risk dhe ndoshta po na shtohet edhe më shumë pasiguria, pas vendimit të Gjykatës së Durrësit”, theksoi Ademi, ndërsa u shpreh se raporti i OSBE/ ODIHR nuk flet për zgjedhje. Lidhur me vendimin e disa prej kryebashkiakëve të djathtë për të mos lëshuar zyrat e tyre, Ademi sqaron se institucionet do të respektohen duke u respektuar të gjitha instrumentet demokratike. “Duke qenë kryetare e Shkodrës do vazhdoj të veproj në emër të legjitimitet. Nuk është çështje force. Ne do të përdorim instrumente demokratike. Fakti që ne jemi duke iu drejtuar gjykatave, tregon se ne duam rrugën demokratike. Më kanë shantazhuar Denar Biba, Sandër Lleshaj, Kryeministri, drejtues të Policisë së Shtetit. Kanë thënë që kryetarët e bashkive të guxojnë të bëjnë këtë e atë. Mund të ndodhë të përsëriten zgjedhjet, të mos kemi konkurrent për një bashki, këtu nuk mbaron puna. Puna e kryetarit të bashkisë mbaron kur ka zgjedhje. Ne nuk po flasim për t’u përshëndetur, çështja është më e thellë kur bëhet fjalë për legjitimitet të përfaqësimit, sepse përgjegjësia është shumë e madhe. Legjitimiteti është fjalë e madhe edhe për atë që duhet të jetë i zgjedhur dhe kjo vlen për të gjithë ata që pretendojnë që në mënyrë ilegjitime të marrin atë që nuk i takon. Do të jem aty deri sa njerëzit na mbështesim. Përfaqësim i denjë, unë jam dhe do të jem kryetare e Bashkisë së Shkodrës”, theksoi kryebashkiakja e Shkodrës.