Basha: Drejtësia në duart e krimit, PD padi në Prokurori zgjedhjeve të 30 qershorit
“Nga moszbatimi i dekretit të Metës te fletët e votimit ‘ kontrabandë’ dhe regjistrimi i BD, pse duhen rrëzuar zgjedhjet”
Kryetari i Partisë Demokratike, Lulzim Basha, është i bindur se me standardet e drejtësisë që tregoi Gjykata e Durrësit në Shqipëri nuk do të ketë kurrë politika me pranga në duar. Duke iu referuar edhe njëherë dhënies nga Gjykata e Durrësit të mandatit kandidates Valbona Sako, Basha theksoi se sot drejtësia është në duart e krimit.
“Drejtësia në të gjithë Shqipërinë është sot në duart e krimit dhe të organizatës kriminale të rilindjes. Sot mes rilindasve dhe krimit nuk ka më asnjë ndryshim. Jemi kthyer në kohët e errëta, kur drejtësia ishte partia kriminale. Me këtë drejtësi nuk do ketë kurrë politikanë në pranga, nuk do ketë kurrë kriminelë në burg. Me këtë drejtësi, prangat janë për njerëzit e thjeshtë dhe krimi e hajdutëria qeveritare bëjnë kërdinë. Çlirimi i vendit nga sundimi i Edi Ramës dhe bandës së tij në qeveri është domosdoshmëri për demokracinë, shtetin e së drejtës dhe stabilitetin e vendit”, tha Basha.
PADIA Ndonëse të bindur për një sistem drejtësie të vënë totalisht nën urdhrat e Kryeministrit Rama, demokratët kërkuan zyrtarisht hetimin e krimeve zgjedhore dhe paditën anëtarët e PS- së në KQZ për shpërdorim të detyrës. Letra e firmosur nga Sekretari i Përgjithshëm i PDsë, Gazment Bardhi, nuk i kursente komentet për punën e bërë deri tani nga Kryeprokurorja Arta Marku, duke kujtuar se më së shumti i ka shërbyer axhendës së Edi Ramës. “Që prej emërimit tuaj antikushtetues si Prokurore e Përgjithshme e Përkohshme, kontrolli i qeverisë mbi Prokurorinë është çimentuar, duke sjellë njëkohësisht çimentimin e kulturës së pandëshkueshmërisë ndaj zyrtarëve të lartë shtetërorë. Gjatë drejtimit tuaj, asnjë zyrtar i lartë i qeverisë, asnjë politikan, asnjë funksionar i lartë publik nuk ka dalë para drejtësisë për krimin e korrupsionit apo të krimeve zgjedhore, megjithëse denoncimet publike kanë qenë me qindra”, thuhet në letrën drejtuar Kryeprokurores Arta Marku. Në dijeni të kësaj letre dhe pretendimeve të opozitës për procesin e 30 qershorit është vënë edhe shefja e Misionit të ODIHR, Audrey Glover.
ZGJEDHJET Për demokratët, janë të paktën shtatë çështje që rrëzojnë si të paligjshëm zgjedhjet e 30 qershorit. Bardhi në shkresën drejtuar Arta Markut i ka kujtuar nga shkeljet ligjore, moszbatimi i dekretit të Presidentit të Republikës dhe deri te fletët kontrabandë në Vaun e Dejës të denoncuar nga PD. “Moszbatimi i dekreteve të Presidentit me pasojë cenimin e së drejtës kushtetuese të qytetarëve për të zgjedhur. Regjistrimi i Bindjes Demokratike në kundërshtim me ligjin. Cenimi i së drejtës së opozitës për të marrë pjesë në administrimin e zgjedhjeve. Mashtrimi dhe manipulimi me të dhënat e pjesëmarrjes në votimet e 30 qershorit. Fletët e votimi “kontrabandë” për votimet në Bashkinë e Vaut të Dejës. Emërimi i komisionerëve në kundërshtim me ligjin nga ana e KQZ. Krimet zgjedhore në të gjithë territorin: blerja e votave, fshehtësia e votës, presioni në administrate”, janë për demokratët arsye të mjaftueshme për të rrëzuar zgjedhjet e 30 qershorit.
Për të treguar se deri ku shkon nënshtrimi i Prokurorisë ndaj qeverisë, Sekretari i Përgjithshëm i PD- së, Gazment Bardhi, nxjerr në pah mosveprimet e Prokurorisë për dosjet e krimeve zgjedhore dhe pasojat për vendin.