Basha: Vendimi për 30 qershorin unanim, bota e pa që Rama s’bën zgjedhje
“Lufta kundër oligarkëve”, premtimi i kreut të PD: Në javën tonë të parë në qeverisje, do heqim traun e Rrugës së Kombit
Opozita nuk është penduar për vendimin e marrë për të mos hyrë në zgjedhjet e 30 qershorit, pavarësisht faktit se humbi të gjithë kontrollin e pushtetit vendor.
Kryetari i Partisë Demokratike, Lulzim Basha, në një takim me demokratët në Tropojë, theksoi se vendimi i marrë për të bojkotuar atë farsë zgjedhore u mor në mënyrë unanime dhe qëllimi për të larguar Edi Ramën nga drejtimi i qeverisë nuk ka ndryshuar. “Vendimi për mospjesëmarrjen në farsën e 30 qershorit ishte vendim politik unanim për të vazhduar betejën, për të arritur objektivin tonë, largimin e kësaj qeverie dhe këtij Kryeministri, rikthimin e së drejtës shqiptarëve për të zgjedhur me votë parlamentin dhe pushtetin vendor që meritojnë”, tha Basha. Sipas liderit të opozitës, qëllimi i aksionit politik nuk ka ndryshuar dhe ai do të vazhdojë deri në largimin e Edi Ramës, krijimin e qeverisë tranzitore, e cila, më pas, do të përgatisë zgjedhjet e parakohshme.
OLIGARKËT Sipas Lulzim Bashës, qeveria prej kohësh ka pushuar së funksionuari dhe tashmë është vënë e gjitha në funksion të oligarkëve, me të cilët ndan buxhetin e shtetit. “Pasuritë minerale, bregdetin, pyjet, gjithë ekonominë, ua ka dhënë për dy lekë klientëve të vet, oligarkëve dhe të fortëve, me të cilët grabit vendin. Pasuritë natyrore, mineralet, mbanin dikur ekonominë dhe ushqenin Shqipërinë, kurse sot nga to nuk merren as taksa dhe asnjë përfitim për shqiptarët, por vetëm pasurim për oligarkët grabitqarë”, u shpreh Basha. Premtimin se PD do të vijë në pushtet përmes një qeverisjeje të ndershme dhe në krah të qytetarëve, Lulzim Basha ua shprehu drejtpërdrejt kuksianëve kur iu premtoi se do të heqë traun në Rrugën e Kombit. “Dua të rikonfirmoj vendosmërinë tonë për të hequr traun e Rrugës së Kombit në javën tonë të parë në pushtet. Sikundër u kam kërkuar të gjitha strukturave të Partisë Demokratike, të bëhen gati që së bashku me qytetarët e Kukësit, me gjithë qytetarët shqiptarë, ta kthejmë shumicën ‘ Rama ik’ të 30 qershorit, në shumicën e një ndryshimi të thellë ekonomik dhe politik për çdo shqiptar, për t’i dhënë fund emigracionit dhe kurbetit që po e tret Kukësin, për t’u kthyer pasuritë e shqiptarëve; rrugët, bregdetin, minierat, pyjet, të gjitha pasuritë e këtij vendi të bekuar nga Zoti, në funksion të mirëqenies dhe punësimit të shqiptarëve”, premtoi kreu i PD- së.
ZGJEDHJET Për Bashën, 13 tetori shihet si një zgjidhje për krizën politike, në të cilën ndodhet vendi, ndaj edhe kërkon që në të njëjtën datë të mbahen zgjedhjet e parakohshme dhe ato vendore. Sipas tij, farsa e 30 qershorit shërbeu për mbarë botën për të parë se Edi Rama nuk mund të realizojë dot zgjedhje pa i vjedhur ato. “Farsa e 30 qershorit i shërbeu mbarë botës për të parë se ky njeri nuk bën dot zgjedhje. Edhe kur vetë kandidon, vetë voton, vetë numëron, vetë tabulon, vetë shpall rezultatin, prapëseprapë nuk rri dot pa i vjedhur zgjedhjet. Për pushtetin dhe pasurinë e tij, është i gatshëm t’i vërë kazmën pluralizmit dhe demokracisë. Aksioni politik i opozitës do të vazhdojë deri në përmbushjen e objektivit, që janë zgjedhjet e parakohshme parlamentare, në të njëjtën ditë me zgjedhjet lokale nën kujdesin e një qeverie tranzitore, pa Edi Ramën”, theksoi kreu i PD- së. Sipas kryedemokratit, vetëm PD mund të sjellë ndryshimin që duan shqiptarët.