Pas zgjedhjeve Rama largon Gjylametin, Bushatin dhe Nikollën
Ndryshojnë sekretariatet, Rama afron Cakaj e Lleshaj, Beqja koordinator i Punës së Këshillave
Asambleja e Partisë Socialiste që pasoi zgjedhjet e 30 qershorit, nuk prodhoi ndryshime në qeveri, por ujërat lëvizën brenda vetë socialistëve.
Pa folur për përgjegjësi të drejtpërdrejtë, por duke nënkuptuar pakënaqësinë për rezultatet e marra, Kryeministri Edi Rama lëvizi të parin ish- ministrin Ditmir Bushati nga drejtimi politik i Qarkut të Shkodrës. Sipas kreut të socialistëve, secili në PS ka detyra dhe secili do të vlerësohet nga vetë procesi, por duke ndier nevojën për të përmirësuar drejtimin politik në qarkun e Shkodrës, vendosi që drejtimin e tij t’ia besonte kryebashkiakut të ri, Valdrin Pjetrit. Pavarësisht se arritën ta fitonin Bashkinë e Shkodrës pa kundërshtarë përballë, socialistët morën në këto zgjedhje 22,213 vota më pak se kryebashkiakja aktuale e Shkodrës, Voltana Ademi, në vitin 2015. Kryeministri Rama ndryshoi edhe koordinatorin politik në Tiranë, duke larguar deputeten Blerina Gjylameti dhe duke ia besuar drejtimin politik të Bashkisë më të madhe në vend Elisa Spiropalit dhe Ervin Bushatit. Edhe në Tiranë socialistëve u munguan 8,006 vota krahasuar me vitin 2015. Në Lezhë drejtimin politik të qarkut në radhët e socialistëve do ta marrë ministri i Brendshëm, Sandër Lleshaj. Kreu i PS- së zëvendësoi ish- ministren e Arsimit, Lindita Nikolla, pas 8.503 votave më pak që socialistët morën në krahasim me mandatin e fituar në vitin 2015 nga Fran Frrokaj. Për Edi Ramën rezultatet do të jenë përcaktuese për të gjithë drejtuesit politikë, por edhe drejtuesit lokalë të socialistëve në gjithë vendin. “Secili ka një detyrë dhe secili do të vlerësohet nga vetë procesi, por dëshiroj që tani, që sot të propozoj disa ndryshime. Së pari, në udhëheqjen e qarqeve, duke ndier nevojën për të përmirësuar drejtimin politik në Qarkun e Shkodrës, qarkun do ta drejtojë kryetari i ri i Bashkisë së Shkodrës. Duke ndier nevojën që në Qarkun e Tiranës të ketë më shumë rezultat, Qarkun propozoj që ta drejtojnë bashkërisht, të ndarë sipas territoreve, Elisa Spiropali dhe Ervin Bushati, ndërsa duke qenë se për arsye të disa ndryshimeve që do t’i shpjegoj pak më poshtë, në sekretariat, Lindita Nikollës do t’i propozoj t’i ngarkojmë një detyrë tjetër, Qarkun e Lezhës ta drejtojë Sandër Lleshi. Ndërsa në qarqet e tjera qëndrojmë siç jemi e pastaj shohim më tutje rezultatet e punës”, tha Rama.
SEKRETARIATET Ndryshime kryetari i PSsë, Edi Rama, propozoi edhe në sekretariate. Pas emërimit si koordinatore politike për Qarkun e Tiranës, Elisa Spiropali i ka lënë vendin ministrit Gent Cakaj për drejtimin e sekretariatit për Rininë. Sekretare e re Dixhitale në PS do të jetë Blerina Gjylameti, sekretariat për të cilin Edi Rama nuk i kurseu rezervat. “Duke qenë i pari politikan që kam bërë ciu– ciu, ju kujtohet besoj, më takon që të ndihem i shqetësuar që jemi shumë larg asaj që duhet të bëjmë e prandaj për këtë besoj që Blerina është njeriu i duhur që gjithë eksperiencën e koordinimit ta transformojmë bashkërisht në një organizim komplet të ri dixhital të partisë”, sqaroi Rama. Në krye të sekretariatit për Burimet Njerëzore është emëruar Lindita Nikolla, e cila zëvendësoi në këtë detyrë ish- zv. kryeministren Senida Mesi. Sekretari për Koordinimin dhe Organizimin do të vijojë të jetë deputeti Arben Pëllumbi, ndërkohë që Ilir Beqja do të jetë sekretari i ri për Koordinimin e Punës së Këshillave.